اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية

شلل العصب السادس 1

    

 

حالة هذا الأسبوع ( 84 ) احمد عامر .. 4 سنوات  من بورسعيد

" شلل العصب السادس "

احمد جاني من بورسعيد مع مامته من كام شهر كده

احمد يا دكتور بيشتكي ان عينه اليمين فيها حول انسي وعاوج رقبته على طول كده .. احمد بيبص براسه يا دكتور جمال .. مش بيبص بعينيه .. هو اتولد كده .. والدكاترة قالوا لي ان ده شلل في العصب السادس .. وده عيب خلقي .. ملهوش حل

طيب .. نتكلم الأول عن موضوع العصب السادس ده ..

العين يا جماعة بيحركها 3 اعصاب خارجين من المخ .. العصب التالت والعصب الرابع والعصب السادس ... انا عرضت حالات كتير على الصفحة قبل كده عن شلل العصب الرابع .. النهاردة أول مرة أعرض لكم حالة عن شلل العصب السادس عند الأطفال .. وده لأن الحول ده عند الأطفال مش بنشوفه كتير ...

العصب السادس هو اللي بيحرك العين لبره ..  يعني العين اللي فيها شلل في العصب السادس  مش بتعرف تتحرك لبره .. وطبعاً العين بيكون فيها حول انسي عشان العضلة الخارجية دي مش شغالة .. فالعضلة الداخلية بتكون أقوى .. فتشد العين ناحية الأنف .. والطفل ياعيني يبقى مش عارف يبص للجنب .. زي احمد كده .. لما قلت له بص يمين يا احمد .. العين الشمال السليمة عرفت تبص يمين عادي .. لكن العين اللي فيها شلل وقفت في الوسط ومعرفتش تبص يمين زي العين التانية .. عشان كده الولاد دول اللي عندهم المرض ده نلاقيهم دايماً عاوجين رقبتهم وبيبصوا بالجنب .. يعني بيبصوا براسهم  .. زي ما قالت مامته بالظبط
وعشان العصب السادس طالع من المخ  فدايماً أول حاجة بنعملها لما نشوف الولاد دول .. اننا بنخليهم يعملوا اشعة على المخ عشان نتأكد الأول انه سليم ..

احمد عمل الأشعة فعلاً ومامته كلمتني من بورسعيد وبعتت لي صور الأشعة على الفيس  .. الحمد لله المخ سليم .. زي الفل

طيب يا مدام احمد محتاج عملية .. هو صحيح العضلة المشلولة دي مش بنعرف نعالجها .. لكن الحل في الحالات دي اننا بناخد شوية الياف من العضلات التانية السليمة ونحطها مكان العضلة المشلولة .. النتيجة بتكون معقولة جداً والله .. صحيح مش عشرة على عشرة .. لكن معقولة جداً .. أولاً الولد هيعدل رقبته مش هيعوجها تاني أبداً .. ثانياً العين هتبقى في الوسط مش حولة كده .. ثالثاً وده الأهم لما ييجي يبص لبرة العين بتتحرك شوية لبرة .. مش للآخر بس بتتحرك برضه .. ييجي نص المشوار كده ..

المهم .. توكلت على الله .. عملت العملية لأحمد .. دي صورته بعد العملية بشهر .. بصراحة النتيجة طلعت أفضل مما كنت أتصور .. الولد عدل رقبته .. والحول الانسي راح تقريباً .. وكمان بيعرف يحرك عينه للجنب بدرجة معقولة قوي  

حمد الله على السلامة يا ابني .. والف مبروك

د جمــال صبحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders