اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية

شلل العصب السادس 2

    

حالة هذا الأسبوع ( 105 ) مالك أسامة محمد .. سنه ونص ..  من أسيوط

" شلل العصب السادس "

زي ما شرحت لحضراتكم قبل كده ازاي العين بتتحرك .. العين بيحركها 3 اعصاب .. العصب التالت والعصب الرابع والعصب السادس ... الأعصاب التلاته دول .. الدكاتره بيسموهم أعصاب مخيه .. لأنهم خارجين من المخ ..

العصب السادس هو اللي بيحرك العين لبره ..  والعين اللي فيها شلل في العصب السادس  طبعاً مش بتعرف تتحرك لبره .. والعين بيكون فيها حول انسي داخلي عشان العضلة الخارجية المشلوله ضعيفه فالعضلة الداخلية اللي في الناحيه التانيه بتكون أقوى .. فتشد العين للداخل ناحية الأنف .. والطفل ياعيني يبقى مش عارف يبص للجنب .. زي اسامة كده .. عشان كده الولاد دول اللي عندهم شلل العصب السادس نلاقيهم دايماً عاوجين رقبتهم وبيبصوا بالجنب .. يعني بيبصوا براسهم مش بعينيهم  ..
وعشان العصب السادس طالع من المخ  فدايماً أول حاجة بنعملها لما نشوف الولاد دول .. اننا بنخليهم يعملوا اشعة على المخ عشان نتأكد الأول ان المخ سليم وان مش هو سبب المشكلة ..

أسامة باباه جاني من اسيوط من حوالي اسبوع ..  عمل الأشعة فعلاً  .. الحمد لله المخ سليم .. زي الفل .. أسامة مولود كده .. يعني عنده شلل خلقي في العصب السادس

في حالات شلل العصب السادس الخلقي بنستنى شويه على أمل ان العصب يرجع يشتغل لوحده من غير عملية .. لكن لو الطفل وصل عمره سنة والعصب فضل مشلول زي ما هو .. يبقى خلاص لازم نعمل العملية

أسامة دلوفتي عنده سنة ونص .. يعني لازم يعمل العملية .. مفيش حل تاني .. ومفيش فايده من الانتظار تاني

انا كلمت باباه بصراحه .. قلت له هو صحيح العضلة المشلولة دي مش بنعرف نعالجها .. لكن الحل في الحالات دي يا اما بنضعف العضله الداخليه عشان ماتشدش العين لجوه .. أو اننا بناخد شوية الياف من العضلات التانية السليمة ونحطها مكان العضلة المشلولة

نتيجة عملية شلل العصب السادس بتكون معقولة جداً والله .. صحيح مش عشرة على عشرة .. لكن معقولة جداً .. أولاً الولد هيعدل رقبته مش هيعوجها تاني أبداً .. ثانياً العين هتبقى في الوسط مش حوله كده على طول وده بيحمي العين في السن الحرجة دي من الضعف والكسل الوظيفي

المهم .. توكلت على الله .. عملت العملية لأسامة .. بصراحة النتيجة طلعت أفضل مما كنت أتصور وأتمنى .. الحمد لله .. الولد عدل رقبته .. والحول الانسي راح خالص

حمد الله على السلامة يا ابني .. والف مبروك

 

لمشاهدة حالات الحول الأخرى قبل وبعد العملية

اضغط هنا وادخل صفحة " حالة هذا الأسبوع "

http://www.hawal-eg.com

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders