اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية

شلل العصب السادس 3

    

حالة هذا الأسبوع ( 107 ) احمد جبر خلف .. 38 سنة ..  من العراق

" شلل العصب السادس "

في سنة 2011 " احمد " اتعرض في العراق لحادث مروع وإصابه شديده في الرأس .. أدت إلى غيبوبه كامله ونزيف من الأذن والأنف والرأس دخل على أثرها الرعايه المركزه مصاباً بكسر في قاع الجمجمه ونزيف في المخ.. المهم كانت مشكله كبيره جداً ربنا نجاه منها وقدر يقف على رجليه بعد شهور من الحادثه .. ولكن

 احمد لقى عينه الشمال داخله لجوه على طول .. ثابته مش بتتحرك .. التشخيص كان " شلل العصب السادس للعين اليسرى " نتيجة الحادثه ونزيف المخ .. والأهم لقى نفسه بيشوف الحاجه اتنين .. كل أما يبص قدامه يشوف الحاجه اتنين .. كان الحل الوحيد عشان يعرف يبص للناس انه يعوج رقبته بالمنظر ده ويبص بالجنب كده عشان يشوف الحاجه واحده مش اتنين .. .. تخيلوا يا جماعه من خمس سنين واحمد عاوج رقبته كده .. ماشي عاوج رقبته كده .. قاعد عاوج رقبته كده .. بيقرا عاوج رقبته كده .. بيبص للموبايل كده .. بيتفرج على التليفزيون كده .. حياته كلها اتلخبطت .. مش عارف يشتغل ولا يسوق عربيته ولا يروح ولا ييجي .. فعلاً حاجه صعبه قوي .. المهم

  في سنة 2012 " احمد " عمل عمليه في الكويت لحل مشكلة العصب السادس لعينه الشمال .. تاني يوم رفع الغطا من على عينه .. مفيش أي نتيجه .. عينه الشمال ثابته زي ما هي .. برضه شايف الحاجه اتنين .. برضه عاوج رقبته .. برضه مش قادر يبص قدامه ..  

في سنة 2015 " احمد " عمل عمليه كبيره تانيه في تركيا ولكن للأسف .. النتيجه برضه كانت صفر .. شايف الحاجه اتنين زي ماهو .. عاوج رقبته على طول زي ما هو ..

" احمد " راسلني على صفحتي على الفيس .. حكى لي القصه الطويله دي .. بعت لي تقارير الاصابه وتقارير الرعايه المركزه وصور اشعة المخ والعين وصور رنين مغناطيسي .. وتقارير مفصله للعمليتين اللي عملهم

رديت عليه بالحرف الواحد .. " بعد ما قرأت التقارير .. وتفاصيل العمليتين وعضلات العين اللي اشتغلوا عليها في الكويت وتركيا .. بصراحه يا أحمد الخيارات أمامي اصبحت محدوده جداً .. كل اللي أقدر اعمله ويارب أتوفق واقدر اعمله انك تعرف تبص قدامك ورقبتك تتعدل لكن العين الشمال برضه مش هتتحرك للخارج .. يعني بعد العمليه ان شاء الله عينك الشمال هتتحرك عادي يمين وفوق وتحت لكن شمال لأ .. لكن هتقدر تبص قدامك وتعدل رقبتك ولو حصل ده تبقى نتيجه هايله "  احمد رتب معايا على الفيس مواعيد السفر لمصر والعمليه والرجوع للعراق .. الموضوع كله أخد 4 ايام .. وصل مصر الصبح .. شفته بلليل في العياده عملت العمليه في المستشفى تاني يوم الصبح .. بالمناسبه .. دي كانت أصعب عمليه عملتها السنه دي .. العمليتين اللي عملهم قبل كده صعبوا الدنيا عليا جداً .. لكن الحمد لله .. يستاهل الحمد .. احمد جالي العياده مساء اليوم التالي  .. مفاجأة سعيده من العيار الثقيل .. احمد فتح باب العياده ودخل يسلم عليا بابتسامه رائعه ورقبته معدوله .. أخيراً بعد خمس سنين من المعاناه أحمد رقبته اتعدلت وقدر يبص قدامه عادي .. اتصور معايا صور تذكاريه كتير .. فرحته ان رقبته اتعدلت فرحه كبيره قوي مش قادر اوصفها      

حمد الله على سلامتك يا استاذ .. والف مبروك

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders