اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي التبادلي 10


    
 

 

حالة هذا الأسبوع ( 183 ) : تاله عبد الكريم صالح .. 6 سنوات .. من السودان 

" الحول الانسي التبادلي "

طبعاً احنا اتكلمنا كتير قبل كده عن الحول التبادلي  وعرفنا ان تبادلي يعني الحول كل شويه بيبدل .. زي تاله كده .. شويه تبقى عينها اليمين هي اللي حوله وعينها الشمال مظبوطه .. تقعد كده شويه وبعدين تقلب عالناحيه التانيه .. عينها الشمال تحول وعينها اليمين تبقى مظبوطه .. انما عمرها ماتظبط عينيها الاتنين ابداً .. دايماً حوله يا باليمين .. يا بالشمال .. بس العيانين دول عندهم حاجة جميلة قوي .. مش ممكن يحصل لهم كسل وظيفي ولا نظرهم يضعف أبداً مهما طالت مدة الحول .. مش زي العيانين التانيين اللي طول عمرهم بيبصوا بعين واحدة بس والعين التانية حوله على طول .. العين اللي حوله على طول زي ما كلنا عارفين نظرها بيضعف جداً .. بتكسل يعني .. انما الحول اللي بيبدل بنلاقي النظر في العينين الاتنين ممتاز .. يعني تاله برغم ان الحول ده عندها من ساعة ما اتولدت .. بس عشان تبادلي نلاقي عينها اليمين 6/6 والشمال 6/6 .. وهتفضل نظرها كويس على طول ومش هيضعف ابداً

كتير من الامهات لما بيعرفوا مني المعلومة دي وان مفيش أي خوف على نظر ابنهم أو بنتهم من الحول التبادلي .. مش بيعملوا العملية على طول .. وساعات بيسيبوا الطفل لما يكبر شوية وبعدين يعملوا له العملية ..

انا عايز أقول هنا حاجة مهمة جداً .. النظر الى الأشياء بالعينين مع بعض في نفس اللحظة من أهم المهارات البصرية عند البشر .. الناس الكبار اللي عندهم حول تبادلي معندهمش المهارة دي .. وعشان كده انا دايماً بأنصح بعمل عملية الحول التبادلي في وقت مبكر عند الأطفال عشان نحافظ على المهارة دي

حاجة تانية مهمة .. بما اننا كده كده هنعمل العملية .. لأن مش معقول أم تسيب ابنها أو بنتها حوله كده .. وأكيد هتعمل العملية .. يبقى نعمل العملية بدري أحسن عشان نبقى حققنا هدفين .. هدف الشكل الحلو وهدف المحافظة على الوظيفة   

تاله جت لي النهارده بعد يومين من العمليه .. عينيها لسه حمرا صحيح لكن الحمد لله عمليتها زي الفل .. شكلها بقى طبيعي خالص

حمد الله على سلامتك يا تاله والف مبروك

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders