اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي التبادلي 2


    
 

حالة هذا الأسبوع : سارة .. 12 سنة .. من القاهرة

الحول الانسي التبادلي : الحول الرائع

 النوع ده من الحول انا دايماً بأسميه " الحول الرائع " ..

الحول الانسي التبادلي ياجماعة مع ان شكله دايماً مش حلو انما ما يتخافش منه أبداً .. حأقولكم ليه ..

تبادلي يعني ايه ؟ ..

يعني العيان كل شوية يبدل .. زي سارة كده .. شوية تبقى عينها اليمين هي اللي حوله وعينها الشمال مظبوطه .. شويه كده وبعدين تقلب عالناحية التانية .. عينها الشمال تحول وعينها اليمين تبقى مظبوطه .. يعني سارة ساعات تبص بالعين اليمين وساعات تبص بالعين الشمال .. عشان كده العيانين دول مش ممكن يحصل لهم كسل وظيفي أبداً زي اللي بيحصل للعيانين اللي بيبصوا بعين واحدة بس والعين التانية حولة على طول .. العين اللي حولة على طول ياجماعة نظرها بيضعف جداً .. بتكسل يعني .. انما العيان اللي بيبدل زي سارة كدة بنلاقي نظرهم في عينيهم الاتنين ممتاز .. حتستغربوا جداً لو قلتلكم ان سارة برغم الحول الفظيع اللي عندها ده .. عينها اليمين 6/6 والشمال 6/6 .. عشان كدة انا باسمي الحول التبادلي " الحول الرائع "

احنا بس بنعمل عملية للحول التبادلي عشان شكل العيان يبقى حلو .. زي سارة كده .. بعد العملية بقت " قمر" .. ولسه لما شوية الاحمرار دول يروحوا بعد اسبوع كده .. مش حنعرف نكلمها ..

انا حابب النهاردة اصحح معلومة للعيانين – ولبعض الدكاترة برضه – ساعات يقولوا للعيان اللي عنده حول تبادلي :

 " لو عملت عملية وعينك اتعدلت حتشوف الحاجة اتنين "

يا سلام !!! .. يعني العيان قبل العملية عايش بالحول ده وكل عين باصة في ناحية وعمره ما شاف الحاجة اتنين .. ولما عينه تتعدل كده حيشوف الحاجة اتنين ؟؟!!! .. كلام غريب والله ..

ياجماعة ازدواج الرؤية المؤقت اللي بيحصل في انواع خاصة جداً من الحول .. عمره ما بيحصل أبداً بعد العمليات الناجحة للحول الانسي التبادلي .. قولاً واحداً ..

زي عملية " القمر " اللي قدامكم دي  

الف مبروك يا حبيبتي .. وحمد الله على سلامتك

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders