اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي التبادلي 3


    
 

حالة هذا الاسبوع

حالة هذا الأسبوع ( 34 ) : هبة ثابت  .. 11 سنة .. من الاسكندرية

" الحول الانسي التبادلي "

الحول الانسي التبادلي ياجماعة مع ان شكله دايماً مش حلو .. والحول بيبقي جامد قوي .. انما ما يتخافش منه أبداً .. حأقولكم ليه ..

تبادلي يعني ايه ؟ ..

يعني العيان كل شوية بيبدل .. زي هبة كده .. شوية تبقى عينها اليمين هي اللي حوله وعينها الشمال مظبوطه .. تقعد كده شويه وبعدين تقلب عالناحية التانية .. عينها الشمال تحول وعينها اليمين تبقى مظبوطه .. انما عمرها متظبط عينيها الاتنين ابداً .. دايماً البنت حولة .. خدوا بالكم  ياجماعة ان هبة ساعات تبص بالعين اليمين وساعات تانية تبص بالعين الشمال .. عشان كده العيانين دول مش ممكن يحصل لهم كسل وظيفي ولا نظرهم بيضعف أبداً مهما طالت مدة الحول .. دول غير العيانين التانيين اللي طول عمرهم بيبصوا بعين واحدة بس والعين التانية حولة على طول .. العين اللي حولة على طول ياجماعة نظرها بيضعف جداً .. بتكسل يعني .. انما العيان اللي بيبدل زي هبة كدة بنلاقي نظرهم في عينيهم الاتنين ممتاز .. حتستغربوا جداً لو قلتلكم ان هبة برغم الحول الجامد اللي انتم شايفينه ده .. عينها اليمين 6/6 والشمال 6/6 .. والعيان بيفضل كده على طول .. مع ان  الحول بيكون جامد قوي الا ان نظره بيبقى كويس  جداً ومش بيضعف ابداً .. وعشان كده كتير من الامهات لما بيعرفوا مني المعلومة دي وان مفيش أي خوف على نظر بنتهم من الحول التبادلي .. مش بيعملوا العملية على طول .. وساعات بيسيبوا البنت لما تكبر شوية وبعدين يعملوا لها العملية .. برضه مش مشكلة .. مش هيحصل حاجة ..  احنا في الآخر بنعمل عملية الحول التبادلي عشان شكل البنت يبقى حلو زي باقي البنات

بس انا النهاردة عايز أأكد لكم تاني على معلومة مهمة .. ساعات الامهات يقولوا لي يا دكتور جمال بيقولوا :

 " لو عملت العملية لبنتك وعينها اتعدلت .. بنتك هتشوف الحاجة اتنين "

يا سلام !!! .. ايه الكلام ده ..  يعني البنت قبل العملية عايشة بالحول ده وكل عين باصة في ناحية وعمرها ما شافت الحاجة اتنين .. ولما تعمل العملية وعينها تتعدل زي بقية البنات هتشوف الحاجة اتنين ؟؟!!! .. كلام غريب والله ..

ياجماعة ازدواج الرؤية المؤقت اللي بيحصل في انواع خاصة جداً من الحول .. عمره ما بيحصل أبداً بعد العمليات الناجحة للحول الانسي التبادلي .. أبداً ..  قولاً واحداً ..

زي عملية " القمر " اللي قدامكم دي .. هبة شكلها بقى رائع بعد العملية .. ونظرها فضل زي ماهو 6/6.. وطبعاً مش بتشوف الحاجة اتنين ولا حاجة 

الف مبروك يا حبيبتي .. وحمد الله على سلامتك

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders