اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي التبادلي 4


    
 

 

حالة هذا الأسبوع ( 75 ) : رضوى  .. 7 سنوات.. من المعادي

" الحول الانسي التبادلي "

تبادلي يعني ايه ؟

يعني الحول كل شويه بيبدل .. زي رضوى كده .. شويه تبقى عينها اليمين هي اللي حوله وعينها الشمال مظبوطه .. تقعد كده شويه وبعدين تقلب عالناحيه التانيه .. عينها الشمال تحول وعينها اليمين تبقى مظبوطه .. انما عمرها ماتظبط عينيها الاتنين ابداً .. دايماً البنت حوله .. بس العيانين دول عندهم حاجة جميلة قوي .. مش ممكن يحصل لهم كسل وظيفي ولا نظرهم يضعف أبداً مهما طالت مدة الحول .. مش زي العيانين التانيين اللي طول عمرهم بيبصوا بعين واحدة بس والعين التانية حوله على طول .. العين اللي حوله على طول زي ما كلنا عارفين نظرها بيضعف جداً .. بتكسل يعني .. انما الحول اللي بيبدل بنلاقي النظر في العينين الاتنين ممتاز .. يعني رضوى برغم الحول ده .. عينها اليمين نظرها 6/6 والشمال 6/6 .. والعيان بيفضل نظره كويس  على طول ومش بيضعف ابداً

كتير من الامهات لما بيعرفوا مني المعلومة دي وان مفيش أي خوف على نظر بنتهم من الحول التبادلي .. مش بيعملوا العملية على طول .. وساعات بيسيبوا البنت لما تكبر شوية وبعدين يعملوا لها العملية ..

انا عايز أقول هنا حاجة مهمة جداً .. النظر الى الأشياء بالعينين مع بعض في نفس اللحظة من أهم المهارات البصرية عند البشر .. الناس الكبار اللي عندهم حول تبادلي معندهمش المهارة دي .. وعشان كده انا دايماً بأنصح بعمل عملية الحول التبادلي في وقت مبكر عند الأطفال عشان نحافظ على المهارة دي

حاجة تانية مهمة .. بما اننا كده كده هنعمل العملية .. لأن مش معقول أم تسيب بنتها حوله كده .. وأكيد هتعملها العملية عشان شكلها يبقى حلو زي باقي البنات .. يبقى نعمل العملية بدري أحسن عشان نبقى حققنا هدفين .. هدف الشكل الحلو وهدف المحافظة على الوظيفة   

زي عملية " القمر " اللي قدامكم دي .. رضوى شكلها بقى رائع فعلاً بعد العملية .. ونظرها فضل زي ماهو 6/6 .. مش كده وبس كمان بتبص بعينيها الاتنين في نفس الوقت

الف مبروك يا حبيبتي .. وحمد الله على سلامتك

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders