اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي التبادلي 7


    
 

 

حالة هذا الأسبوع ( 145 ) : احمد عبد الرحمن  .. 5 سنين .. من كفر الشيخ

" الحول الانسي التبادلي "

يعني ايه حول تبادلي ؟

يعني الحول كل شويه بيبدل .. زي احمد كده .. من يوم ما اتولد وهو شويه تبقى العين اليمين هي اللي حوله والعين الشمال معدوله .. وبعد شويه يقلب عالناحيه التانيه .. العين الشمال تحول والعين اليمين تتعدل .. انما العيان عمره ماعينيه الاتنين يتعدلوا ابداً .. على طول أحول .. يا باليمين .. يا بالشمال ..

الحول التبادلي ياجماعه من انواع الحول اللي متخوفش ابداً .. لأن الناس اللي عندها حول تبادلي مش ممكن نظرهم يضعف أو يحصل لهم كسل وظيفي مهما طالت مدة الحول .. مش زي العيانين التانيين اللي الحول عندهم مش بيبدل وبيبصوا بالعين المعدوله بس .. دول عمرهم ما بيبصوا بالعين الحوله .. وزي ما كلنا عارفين العين اللي حوله على طول نظرها بيضعف جداً .. بتكسل يعني .. انما الحول اللي بيبدل بنلاقي النظر في العينين الاتنين ممتاز عشان العيان بيبص بالعين دي شويه وبالعين دي شويه ..  يعني احمد برغم الحول ده .. عينه اليمين نظرها 6/6 والشمال نظرها برضه 6/6 .. وهيفضل نظره كويس على طول ومش هيضعف ابداً

كتير من الامهات لما بيعرفوا مني المعلومه دي وان مفيش أي خوف على نظر ابنهم أو بنتهم من الحول التبادلي .. مش بيعملوا العمليه على طول .. ساعات بيسيبوا ابنهم لما يكبر شويه وبعدين يعملوا له العمليه ..

انا عايز أقول هنا حاجه مهمه جداً .. النظر الى الأشياء بالعينين مع بعض في نفس اللحظه من أهم المهارات البصرية عند البشر .. الناس الكبار اللي عندهم حول تبادلي معندهمش المهارة دي .. وعشان كده انا دايماً بأنصح بعمل عملية الحول التبادلي في وقت مبكر عند الأطفال عشان نحافظ على المهاره دي

حاجة تانيه مهمه .. بما اننا كده كده هنعمل العمليه .. لأن مش معقول أم تسيب ابنها أو بنتها حوله كده .. وأكيد هتعمل العمليه .. يبقى نعمل العمليه بدري أحسن عشان نبقى حققنا هدفين .. هدف الشكل الحلو وهدف المحافظه على الوظيفه   

احمد جالي النهارده بعد شهر من العمليه .. الحمد لله عمليته زي الفل .. شكله بقى طبيعي خالص .. مفيش أي حول .. والحمد لله نظره في عينيه الاتنين ممتاز .. والمفاجأة الكبرى ان مركز الاتحاد في المخ قدر يجمع صورة العين اليمين وصورة العين الشمال مع بعض وقدر يشوف صوره واحده بعينيه الاتنين في نفس الوقت مع انه عمل العمليه متأخر شويه

حمد الله على سلامتك يا ابني والف مبروك

د. جمــال صبـــحي




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders