اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي التبادلي 9


    
 

حالة هذا الأسبوع ( 161 ) : شيرين  .. 20 سنة .. من بني سويف

" الحول الانسي التبادلي "

تبادلي يعني ايه ؟

يعني الحول كل شويه بيبدل .. زي شيرين كده .. شويه تبقى عينها اليمين هي اللي حوله وعينها الشمال مظبوطه .. تقعد كده شويه وبعدين تقلب عالناحيه التانيه .. عينها الشمال تحول وعينها اليمين تبقى مظبوطه .. انما عمرها ماتظبط عينيها الاتنين ابداً .. دايماً حوله يا باليمين .. يا بالشمال .. بس العيانين دول عندهم حاجة جميلة قوي .. مش ممكن يحصل لهم كسل وظيفي ولا نظرهم يضعف أبداً مهما طالت مدة الحول .. مش زي العيانين التانيين اللي طول عمرهم بيبصوا بعين واحدة بس والعين التانية حوله على طول .. العين اللي حوله على طول زي ما كلنا عارفين نظرها بيضعف جداً .. بتكسل يعني .. انما الحول اللي بيبدل بنلاقي النظر في العينين الاتنين ممتاز .. يعني شيرين برغم الحول ده .. عينها اليمين 6/6 والشمال 6/6 .. وهتفضل نظرها كويس على طول ومش هيضعف ابداً

كتير من العيانين لما بيعرفوا مني المعلومة دي وان مفيش أي خوف على نظرهم من الحول التبادلي .. مش بيعملوا العملية على طول .. وساعات يستنوا سنين وبعدين يعملوا العملية ..

انا عايز أقول هنا حاجة مهمة جداً .. النظر الى الأشياء بالعينين مع بعض في نفس اللحظة من أهم المهارات البصرية عند البشر .. الناس الكبار اللي عندهم حول تبادلي معندهمش المهارة دي .. وعشان كده انا دايماً بأنصح بعمل عملية الحول التبادلي في وقت مبكر عند الأطفال عشان نحافظ على المهارة دي

حاجة تانية مهمة .. بما اننا كده كده هنعمل العملية .. لأن مش معقول أم تسيب ابنها أو بنتها حوله كده .. وأكيد هتعمل العملية .. يبقى نعمل العملية بدري أحسن عشان نبقى حققنا هدفين .. هدف الشكل الحلو وهدف المحافظة على الوظيفة   

شيرين جت لي النهارده بعد شهر من العمليه .. الحمد لله عمليتها زي الفل .. شكلها بقى طبيعي خالص .. الحمد لله نظرها في عينيها الاتنين ممتاز .. والمفاجأة ان مركز الاتحاد في المخ قدر يجمع الصورتين مع بعض بدرجه معقوله جداً وقدرت تشوف صوره واحده بعينيها الاتنين في نفس الوقت

حمد الله على سلامتك يا بنتي والف مبروك

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders