اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي التبادلي 10

 

حالة هذا الأسبوع ( 185 ) حسام احمد محمد .. 8 سنوات .. من قنا

" الحول الوحشي التبادلي "

الولد السكر ده جالي من اسبوع من قنا .. واضح ان حسام شخصية مهمة جداً .. كان معاه أعمامه وأخواله وباباه وكده .. قمت كشفت عليه لقيت عنده الحول المشهور اللي كلمتكم عنه أكتر من مرة .. الحول الوحشي التبادلي

 برغم ان الحول التبادلي بيكون جامد قوي .. وبيأثر جداً على شكلنا .. انما محدش يقلق منه أبداً .. هأقول لكم السبب ..

هو حول تبادلي يعني ايه ؟

يعني العيان كل شوية يبدل .. شوية تبقى عينه اليمين هي اللي حوله وعينه الشمال مظبوطه .. يقعد شويه كده وبعدين يقلب على الناحية التانية .. عينه الشمال تحول وعينه اليمين تبقى مظبوطه .. زي حسام  كده .. ساعات يبص بالعين اليمين وساعات يبص بالعين الشمال .. عشان كده العيانين اللي عندهم الحول ده مش ممكن نظرهم يضعف أويحصل لهم كسل وظيفي زي اللي بيحصل للعيانين اللي عندهم حول دائم .. العيانين بتوع الحول الدائم بنلاقي عندهم عين واحدة بس حوله على طول مش بتتعدل ابداً.. وزي مانتم عارفين العين اللي حوله على طول بتضعف جداً .. انما العيانين اللي بيبدلوا بيبصوا بكل عين نص الوقت تقريباً .. عشان كده بنلاقي النظر في العينين الاتنين ممتاز..

بس برضه عيان الحول التبادلي ناقصه حاجتين مهمين .. أولاً هو مش بيبص للصورة بعينيه الاتنين في نفس الوقت .. وثانياً الحرج الشديد اللي بيسببه الحول للعيان .. صحيح  بيبدل لكن في الحقيقة هو أحول طول الوقت .. العيانين دول برغم ان نظرهم كويس لكن كلهم بيعملوا عملية الحول ومش بيقبلوا يكملوا حياتهم كده.

آخر معلومة عايز أقولها هنا عن الحول التبادلي لأن كل العيانين بيسألوني عليها :

" طيب هو الحول التبادلي بعد مانصلحه بالعملية .. ممكن يرجع يا دكتور جمال ؟ "

والاجابة لأ .. لايمكن يرجع أبداً .. الحول ده بالذات مادام اتعمله عملية مظبوطة  مش بيرجع أبداً

المهم عملت العملية لحسام من كام يوم .. جالي النهارده في العيادة اطمن عليه قبل ما يرجعوا قنا .. الحمد لله رب العالمين .. عمليته حلوة فعلاً .. ألف حمد الله على سلامتك ياحبيبي

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders