حالة هذا الأسبوع ( 190 ) : محمد حسين عوض .. 30 سنة .. من السويس 

" الحول الوحشي التبادلي "

قبل ما ندخل في موضوع الحالة لازم اشكرك الأول يا محمد انك وافقت اني انزل صورتك على صفحتي

محمد الشاب السويسي السكر ده زي كل السوايسة جالي العيادة من شهر تقريبا بيشتكي من الحول الجامد ده .. الحول ظهر عند محمد من زمان وكان متردد جداً يعمل العملية .. قالي بالحرف الواحد ان الحالات اللي انا بانزلها على صفحتي شجعته وخلته ياخد قرار انه بعمل العملية ويعدل الحول بس هو خايف نظره يتأثر من العملية لأنه نظره في عينيه الاتنين كويس جداً عشان الحول اللي عنده حول تبادلي .. طبعاً شرحت له الكلام اللي كلكم عارفينه ان عمليات الحول بتتعمل في عضلات العين مش في العين نفسها وعشان كده مش ممكن تأثر على النظر

تاني يوم الصبح عملت العملية لمحمد وسافر السويس بعد العملية على طول 

احنا اتكلمنا كتير قبل كده عن الحول التبادلي  وعرفنا ان تبادلي يعني الحول كل شويه بيبدل .. زي محمد كده .. شويه تبقى عينه اليمين هي اللي حوله وعينه الشمال مظبوطه .. يقعد كده شويه وبعدين يقلب عالناحيه التانيه .. عينه الشمال تحول وعينه اليمين تبقى مظبوطه .. انما عمره مايظبط عينيه الاتنين ابداً .. دايماً أحول يا باليمين .. يا بالشمال .. بس العيانين دول عندهم حاجة جميلة قوي .. مش ممكن يحصل لهم كسل وظيفي ولا نظرهم يضعف أبداً مهما طالت مدة الحول .. مش زي العيانين التانيين اللي طول عمرهم بيبصوا بعين واحدة بس والعين التانية حوله على طول .. العين اللي حوله على طول زي ما كلنا عارفين نظرها بيضعف جداً .. بتكسل يعني .. انما الحول اللي بيبدل بنلاقي النظر في العينين الاتنين ممتاز .. يعني محمد برغم ان الحول ده عنده من زمان.. بس عشان تبادلي نلاقي عينه اليمين 6/6 والشمال 6/6 .. وهيفضل نظره كويس على طول ومش هيضعف ابداً

كتير من العيانين لما بيعرفوا مني المعلومة دي وان مفيش أي خوف على نظرهم من الحول التبادلي .. مش بيعملوا العملية على طول .. وساعات بيستنوا كتير وبعدين يعملوا العملية .. بس في الآخر بيعملوها لأن الحول التبادلي عادة بتكون درجته كبيرة أوي وبيأثر على الشكل   

محمد جالي النهارده .. الحمد لله عمليته زي الفل

حمد الله على سلامتك يا محمد والف مبروك