اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي التبادلي 4


 

حالة هذا الأسبوع ( 134 ) محمد علي بيومي .. 24 سنة .. من بنها

" الحول الوحشي التبادلي "

أولاً الف شكر ليك يامحمد انك وافقت اني انزل صورك على صفحتي 

 نتايج عمليات الحول الوحشي التبادلي لازم الناس تشوفها .. انا نفسي كل شاب وشابه في عمر محمد عندهم نفس الحول ده يراجعوا نفسهم تاني .. ليه راضين بالوضع ده ؟ .. انا فعلاً باستغرب جداً لما يخش عيادتي شاب أو شابه في عمر محمد كده وعنده الحول ده ويدور بينا الحوار التالي :

- " من امتى يا محمد وانت كده ؟ "

- " انا مولود كده يا دكتور جمال  "

- " يعني ايه مولود كده ؟ .. ( طبعاً باقولها وانا متغاظ عالآخر ).. عشت احلى سنين عمرك كده  ؟  .. خلصت دراستك وانت كده ؟ .. كنت بتقابل زمايلك واصحابك كده ؟ .. ليه يابني ؟ .. فين والدك .. فين والدتك .. سايبينك ازاي كده ؟ "

- " والله يا دكتور الناس كلهم خوفوا بابا وماما من العمليه وقالولي إوعي تسيب حد يلعب في عينيك .. وانت عارف طبعاً يا دكتور ان اللعب في العينين غلط .. كذا واحد عمل عمليه في بلدنا وعينيهم باظت وحضرتك سيد العارفين "

- " لا والله انا مش عارف يا محمد .. احنا يابني مش بنلعب في عينين حد .. احنا أساساً مش بنلعب .. كما ان عمليات الحول مبتبقاش في العين اصلاً .. بتبقى في العضلات اللي بتحرك العين .. والعضلات دي بره العين خالص .. بعيد عنها يعني .. يعني مش ممكن واحد عينه تبوظ لو عمل عملية حول .. حتى يعني لو العمليه معدلتش عينه برضه عينه مش هتبوظ .. انا بقالي يا محمد اكتر من 30 سنه باعمل عمليات حول ماشفتش حد عينه باظت ولا حاجه ..المهم .. ياترى ليه غيرت رأيك دلوقتي ؟!!! "

- " أنا جايلي عقد عمل .. وعندي كشف طبي عشان السفر .. وقالوا لي لازم تشوف حل في موضوع الحول ده "

- " ياسلام !! عقد عمل !! .. يعني لو مفيش عقد عمل كنت هتكمل حياتك بالشكل ده يا محمد ؟! ..

المهم .. تاني يوم عملت العمليه لمحمد .. رجع بنها بعد العمليه بساعه ..  وفضل معايا بالتليفون يوم بيوم .. عيني حمرا .. بتدمع .. وارمه شويه .. والشكوى العاديه دي اللي كل العيانين بيشتكوها بعد العمليه وانا اتعودت عليها خلاص

محمد جاني النهارده .. فات على عمليته اسبوع .. لسه عينه حمرا شويه .. بس ايه .. الولد يا جماعه طلع كيوت جداً .. شكله بعد العمليه .. حاجه غير خالص .. هو نفسه بيقول " انا مش مصدق شكلي .. 24 سنة متعود على شكلي كده .. ربنا يخليك يا دكتور جمال .. اخيراً بقى عندي الجرأة اني ابص في عينين اللي بيكلمني من غير كسوف .. انا حاسس يا دكتور ان انا بقيت انسان تاني "

حمد الله على سلامتك يا محمد ... عمليتك حلوة فعلاً .. وشكراً كمان مرة انك وافقت انزل صورك على صفحتي

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders