اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي التبادلي 5


 

حححالة هذا الأسبوع ( 141 ) خالد محمد خالد .. 24 سنة .. من قنا

" الحول الوحشي التبادلي "

من اسبوعين كده جالي تليفون :

- صباح الخير يا دكتور جمال .. انا اسمي خالد محمد خالد .. انا كشفت عند حضرتك سنة 2014 .. انت قلت لي ان الحول اللي عندي علاجه عملية .. انا عايزك تحدد لي ميعاد العملية .. ياريت اعملها الاسبوع ده

( وهو بيكلمني .. فتحت التاب بتاعي اللي عليه ملفات المرضى .. فتحت ملف خالد .. الشاب الصعيدي المحترم ده جالي من 4 سنين فعلاً .. كان ساعتها عنده 20 سنة .. كان لسه بيدرس .. انا كاتب عندي ان عنده حول وحشي تبادلي درجته كبيرة أوي .. وكاتب برضه انه محتاج عملية .. غريبه انه معملهاش لحد دلوقتي )

- معقول يا خالد .. انت لسه معملتش العملية ؟

- دكتور جمال .. انا خلصت دراسه وجالي شغل مهم جداً في فندق في الغردقة .. حضرتك عارف اننا في قنا بنسعى دايماً اننا نلاقي فرصه للعمل في السياحه .. الفرصه جت لي أخيراً .. فرصه للعمل في فندق كبير في الغردقة .. الفرصه دي متوقف عليها مستقبلي يا دكتور جمال .. لكن طبعاً مش ممكن اروح الفندق وأتعامل مع السياح وانا عندي الحول ده .. هما أصلاً مش هيرضوا يشغلوني .. عشان كده انا عايز اعمل العمليه في اسرع وقت قبل الإنترفيو

نتكلم الأول عن الحول الوحشي التبادلي

هو تبادلي يعني ايه ؟ ..

يعني العيان كل شوية يبدل .. شوية تبقى عينه اليمين هي اللي حوله وعينه الشمال مظبوطه .. وشوية عينه الشمال تحول وعينه اليمين تبقى مظبوطه .. وزي مانتم عارفين ان العيانين اللي الحول بتاعهم تبادلي بيبصوا بكل عين نص الوقت تقريباً .. عشان كده بنلاقي النظر في العينين الاتنين ممتاز.. لكن دايماً العيان ده بيشتكي من الحرج الشديد اللي بيسببه الحول لأن عادة الحول التبادلي بيكون جامد قوي .. زي خالد كده قبل العملية

آخر معلومة عايز أقولها هنا عن الحول التبادلي لأن كل العيانين بيسألوني عليها :

" طيب هو الحول التبادلي بعد مانصلحه بالعملية .. ممكن يرجع تاني يا دكتور جمال ؟ "

والاجابة لأ .. لايمكن يرجع أبداً .. الحول ده بالذات مادام اتعمله عملية مظبوطه مش بيرجع أبداً..

المهم .. عملت العملية لخالد بعد المكالمة دي بيومين .. خالد سافر قنا بعد العملية بساعه تقريباً .. بعد اسبوع بعت لي صورته على الواتس .. عينه كانت لسه حمرا لكن صورته بتقول ان العمليه نتيجتها ممتازه والحول اختفى تماماً .. رديت عليه خلاص يا خالد عمليتك حلوه أوي .. استمر في القطرة اسبوعين كمان وبعدين بطلها .. ومش لازم تيجي من قنا من آخر الدنيا عشان اشوفك استشارة .. الصوره اللي بعتها على الواتس دي تغني .. كمل القطرة وخلاص زي ماتفقنا.

فات على القصه دي حوالي شهر .. النهارده فوجئت بخالد عندي في العياده .. كان في القاهره وفات عليا يشكرني .. الحمد لله نجح في الإنترفيو واشتغل الشغلانه اللي طول عمره بيحلم بيها .. فندق في الغردقة .. دي صورته بعد العمليه بشهر .. حاجه تانيه خالص .. شكله بقى غير .. مش هتتصوروا فرحتي بتكون أد ايه بالحالات اللي زي حالة خالد دي يا جماعه .. ربنا جعلني سبب اني اساعده وآخد بايده وأيسر عليه حاجه مهمة في حياته وطريق مستقبله .. حاجه تفرح والله ..

حمد الله على سلامتك ياخالد وربنا يوفقك يا ابني

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders