اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي التبادلي 6


 

 

حالة هذا الأسبوع ( 141 ) الشيخ / حسين عارف .. 28 سنة .. من العمرانية .. الجيزة

" الحول الوحشي التبادلي "

من حوالي اسبوع كده جالي تليفون من نمرة غريبة طلعت على التروكولر باسم الشيخ / حسين :

- الو .. اهلاً وسهلاً ياحاج .. تحت امرك

- من وانا صغير عندي حول يا دكتور جمال.. شبه حالة هذا الاسبوع اللي انت منزلها النهارده بالظبط .. حالة الحول الوحشي التبادلي .. وعايز اعمل عملية عشان الحول ده .. أجيلك اكشف امتى ؟

- تنور يا حاج .. اشوفك الأول في العيادة 7 مساءً ان شاء الله .. واديته نمرة العيادة عشان يحجز.

بعد المكالمة قعدت افكر .. يا ترى يا ترى يا شيخ حسين عندك كام سنة .. خمسين .. ستين .. ولا أكتر .. انا بقالي كتير معملتش عمليات لناس كبار في السن .. انا باحب الحالات دي جداً .. آخر حالة كانت حالة هذا الاسبوع رقم 137 .. كانت من شهرين كده .. كان راجل عنده 58 سنة .. ياترى .. يا هل ترى الشيخ / حسين أكبر من كده بكام سنة.

بليل في العيادة .. أول مادخلت سألت الممرضة " حد حاجز النهارده باسم حسين " .. قالت آه .. فيه حجز باسم حسين محمود عارف.

بعد شويه دخل شابين واحد منهم عنده حول وحشي :

- اهلاً وسهلاً .. الاسم ايه ؟

- حسين محمود عارف

- ايه ده .. انت حسين عارف اللي اتصلت بيا النهارده .. انت عندك كام سنة يا حسين
- 28 سنه .. فيه حاجه يادكتور جمال

- التروكولر مسميك الشيخ / حسين .. كنت فاكرك راجل عجوز

- انا إمام وخطيب مسجد في العمرانية .. الناس بتقولي يا شيخ حسين ..

شوفوا ازاي .. الشيخ حسين طلع الشاب الطيب المؤدب ده .. مش راجل عجوز ولا حاجه .. اول انطباع يجيلك لما تشوفه .. ياربي هو لسه فيه ادب كده .. لسه فيه اخلاق كده .. لسه فيه ناس كده .. ولد زي النسمه .. حاجه كده من بتاعة زمان ..

- خيراً يا حسين

- انا متابع صفحتك يا دكتور جمال من فترة .. انا عندي حول وحشي تبادلي زي الحاله اللي انت منزلها النهارده بتاعة المريض خالد .. الحالة رقم 141 .. انا امام مسجد .. وباخطب في الناس .. انت عارف الحول بيأثر ازاي على شكل الواحد خصوصاً لما بيكون شغله مع الجمهور .. انا ببساطه شغلي كده .. انا اتكلم والناس كلها تبص في وشي .. تخيل .. لازم نشوف حل في الحول اللي عندي ده

افكركم تاني بالحول الوحشي التبادلي

هو تبادلي يعني ايه ؟ ..

يعني العيان كل شوية يبدل .. شوية تبقى عينه اليمين هي اللي حوله وعينه الشمال مظبوطه .. وشوية عينه الشمال تحول وعينه اليمين تبقى مظبوطه .. وزي مانتم عارفين ان العيانين اللي الحول بتاعهم تبادلي بيبصوا بكل عين نص الوقت تقريباً .. عشان كده بنلاقي النظر في العينين الاتنين ممتاز.. لكن دايماً العيان ده بيشتكي من الحرج الشديد اللي بيسببه الحول لأن عادة الحول التبادلي بيكون جامد قوي .. زي حسين كده قبل العملية

آخر معلومة عايز أقولها هنا عن الحول التبادلي لأن كل العيانين بيسألوني عليها :

" طيب هو الحول التبادلي بعد مانصلحه بالعملية .. ممكن يرجع تاني يا دكتور جمال ؟ "

والاجابة لأ .. لايمكن يرجع أبداً .. الحول ده بالذات مادام اتعمله عملية مظبوطه مش بيرجع أبداً.. المهم .. عملت العملية لحسين من اسبوع كده .. وقلت له اشوفك استشارة زي النهارده ان شاء الله.

زي مانتم عارفين من يومين كده حذفت حالة هذا الاسبوع رقم 141 بتاعة خالد .. زي ماحكيت لكم في البوست اللي فات .. الحالة دي هي اللي خلت حسين يتشجع وييجي يعمل العملية .. نفس نوع الحول .. الحول الوحشي التبادلي .. حذفتها وانا زعلان أوي .. كانت حالة حلوة أوي .. كانت عاجبه الناس أوي.. بليل قاعد في العياده بافكر في الموضوع ده .. وفجأة دخل عليا حسين عارف ومعاه صاحبه .. فات اسبوع على العمليه .. عينيه طبعاً لسه حمرا .. بس عمليته هايله .. ممتازه .. الحول اتعدل عشرة على عشرة .. حاجه تفرح والله .. شفت حسين واطمنت عليه وعلى العلاج بتاعه وفجأة .. وانا باسلم عليه .. لقيته بيقول : لو عايز تنزل حالتي على صفحتك يا دكتور جمال في حالة هذا الاسبوع مفيش أي مانع .. ده شيئ يسعدني

نزلتها النهارده فعلاً .. وسميتها 141 بدل الحاله المحذوفه .. نفس نوع الحول بالظبط .. سبحان الله .. يقطع من هنا ويوصل من هنا

حمد الله على سلامتك ياحسين .. قصدي ياشيخ / حسين ..  وربنا يوفقك يا ابني

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders