اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي التبادلي 7


 

 

حالة هذا الأسبوع ( 155 ) سها .. 17 سنة .. من اسيوط

" الحول الوحشي التبادلي "

 نتايج عمليات الحول الوحشي التبادلي لازم الناس تشوفها .. انا نفسي كل شاب وشابه في عمر سها عندهم نفس الحول ده يراجعوا نفسهم تاني .. ليه راضين بالوضع ده ؟ .. انا فعلاً باستغرب جداً لما يخش عيادتي شاب أو شابه في عمر سها كده وعندها الحول ده ويدور بينا الحوار التالي :

- " من امتى يا سها وانتي كده ؟ "

- " انا مولوده كده يا دكتور جمال  "

- " يعني ايه مولوده كده ؟ .. ( طبعاً باقولها وانا متغاظ عالآخر ).. عشتي احلى سنين عمرك كده  ؟  .. ابتدائي واعدادي وثانوي وانتي كده ؟ .. كنتي بتقابل زمايلك واصحابك كده ؟ .. ليه يابنتي ؟ .. فين والدك .. فين والدتك .. سايبينك ازاي كده ؟ "

- " والله يا دكتور الناس كلهم خوفوا بابا وماما من العمليه وقالوا لهم إوعي تسيب حد يلعب في عينين بنتكم .. وانت عارف طبعاً يا دكتور ان اللعب في العينين غلط .. كذا واحد عمل عمليه في بلدنا وعينيهم باظت "

- " لا والله انا مش عارف يا سها .. احنا يابنتي مش بنلعب في عينين حد .. احنا أساساً مش بنلعب .. كما ان عمليات الحول مبتبقاش في العين اصلاً .. بتبقى في العضلات اللي بتحرك العين .. والعضلات دي بره العين خالص .. بعيد عنها يعني .. يعني مش ممكن واحد عينه تبوظ لو عمل عملية حول .. حتى يعني لو العمليه معدلتش عينه برضه عينه مش هتبوظ .. انا يا سها طول عمري باعمل عمليات حول ماشفتش حد عينه باظت ولا حاجه ..المهم .. ياترى ليه غيرتي رأيك دلوقتي ؟!!! "

- " أنا السنه دي تالته ثانوي .. السنة الجاية داخلة الجامعة ان شاء الله .. مش معقول اخش الكلية كده "

- " ياسلام !! الكلية !! .. يعني لو مفيش كلية كنت هتكملي حياتك بالشكل ده يا سها ؟! ..

الأول انا عايز افكركم تاني بالحول الوحشي التبادلي

هو تبادلي يعني ايه ؟ ..

يعني العيان كل شوية يبدل .. شوية تبقى عينه اليمين هي اللي حوله وعينه الشمال مظبوطه .. وشوية عينه الشمال تحول وعينه اليمين تبقى مظبوطه .. وزي مانتم عارفين ان العيانين اللي الحول بتاعهم تبادلي بيبصوا بكل عين نص الوقت تقريباً .. عشان كده بنلاقي النظر في العينين الاتنين ممتاز.. لكن دايماً العيان ده بيشتكي من الحرج الشديد اللي بيسببه الحول لأن عادة الحول التبادلي بيكون جامد قوي .. زي سها كده قبل العملية

المهم .. تاني يوم عملت العمليه لسها .. دي صورتها بعد العملية بساعة وبعدها سافرت اسيوط .. بعد كده اتواصلت معايا على الواتس يوم بيوم .. عيني حمرا .. بتدمع .. وارمه شويه .. والشكوى العاديه دي اللي كل العيانين بيشتكوها بعد العمليه .. يوم في التاني الاحمرار ده بيروح وبترجع العين طبيعية تماماً

حمد الله على سلامتك يا سها ... عمليتك حلوة فعلاً .. وربنا يوفقك يا بنتي

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders