اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي التبادلي 9

حالة هذا الأسبوع ( 176 ) مصطفى عبد الواحد محمد .. 19 سنة .. من سوهاج

" الحول الوحشي التبادلي "

مصطفى ولد صعيدي زي السكر .. خفة دم وطيبة وجدعنة فوق الوصف .. كان معاه اتنين اخواته الكبار .. من بعيد كده لاحظت ان مصطفى عنده حول وحشي جامد قوي .. ولاحظت ان الحول بيبدل .. ساعات في العين دي وساعات في العين دي

- خير ياجماعة

- احنا كشفنا على مصطفى عندنا في سوهاج وكل الدكاترة قالوا الحول ده علاجه عملية .. احنا جايين من آخر الدنيا نعملها عندك يا دكتور جمال

- أهلاً وسهلاً بيكم

   المهم قمت أشوف مصطفى لقيت فعلاً عنده الحول المشهور اللي كلمتكم عنه قبل كده .. الحول الوحشي التبادلي .. وزي ما قلت لكم برغم ان الحول التبادلي بيكون جامد قوي .. انما محدش يقلق منه أبداً .. هأقول كم السبب

هو حول تبادلي يعني ايه ؟ ..

يعني العيان كل شوية يبدل .. شوية تبقى عينه اليمين هي اللي حوله وعينه الشمال مظبوطه .. يقعد شويه كده وبعدين يقلب على الناحية التانية .. عينه الشمال تحول وعينه اليمين تبقى مظبوطه .. عشان كده العيانين اللي عندهم الحول ده مش ممكن نظرهم يضعف أويحصل لهم كسل وظيفي زي اللي بيحصل للعيانين اللي عندهم حول دائم .. العيانين بتوع الحول الدائم بنلاقي عندهم عين واحدة بس حوله على طول مش بتتعدل ابداً.. وزي مانتم عارفين العين اللي حوله على طول بتضعف جداً .. انما العيانين اللي بيبدلوا بيبصوا بكل عين نص الوقت تقريباً .. عشان كده بنلاقي النظر في العينين الاتنين ممتاز..

بس برضه عيان الحول التبادلي ناقصه حاجتين مهمين .. أولاً هو مش بيبص للصورة بعينيه الاتنين في نفس الوقت .. وثانياً الحرج الشديد اللي بيسببه الحول للعيان .. صحيح  بيبدل لكن في الحقيقة هو أحول طول الوقت .. العيانين دول برغم ان نظرهم كويس لكن كلهم بيعملوا عملية الحول ومش بيقبلوا يكملوا حياتهم كده.

آخر معلومة عايز أقولها هنا عن الحول التبادلي لأن كل العيانين بيسألوني عليها :

" طيب هو الحول التبادلي بعد مانصلحه بالعملية .. ممكن يرجع يا دكتور جمال ؟ "

والاجابة لأ .. لايمكن يرجع أبداً .. الحول ده بالذات مادام اتعمله عملية مظبوطة  مش بيرجع أبداً..

دي صورة مصطفى دلوقتي .. الحمد لله عمليته رائعة .. كفاية ضحكته الحلوة اللي بتبين أد ايه هو فرحان ازاي بشكله الجديد الجميل

حمد الله على سلامتك يا ابني وربنا يوفقك

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders