اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 10



    
 

 

حالة هذا الأسبوع ( 64 ) أروى عبد الله ..7 شهور .. من القاهرة

" الحول الانسي للاطفال الرضع "

ياجماعة انا مش هابطل اتكلم ابدا عن الحول الانسي عند الاطفال الرضع .. كتير من الكبار اللي بيجولي عندهم حول انسي بيدور بينا الحوار المتكرر ده :

·     " من امتى يابنتي عندك الحول ده ؟ "

·     " من زمان يادكتور جمال .. ماما بتقول انا اتولدت كده "

·     " طيب يابنتي سايباها ليه لحد دلوقتي ؟ "

 

كلهم بيقولوا اجابات واحده .. هي هي ..

·     " ماما كانت خايفة عليا .. قالت لما أكبر شوية نبقى نكشف "

·     " قالوا كل العيال بيتولدوا كده وبعدين عينهم بتتعدل لوحدها "

·     " اصل بيقولوا اللي بيعمل عملية حول .. الحول بيرجع لهم تاني "

 طيب نقول تاني يا جماعة لعاشر مرة .. أي بيبي عنده أكتر من 4 شهور يظهر عنده حول انسي .. يعني عينه تخش لجوة زي أروى كده يبقى لازم نكشف عليه فوراً .. ده اسمه الحول الانسي للاطفال الرضع .. اوعوا تصدقوا اللي يقول لكم ان كل العيال بيتولدوا كده.. لأ طبعاً .. مش كل العيال بيتولدوا كده ولا حاجة .. كلامكم ده مش صح .. بصوا حواليكم هتلاقوا مش كل العيال كده ولا حاجة .. بنتكم بس هي اللي كده

الحول الانسي للاطفال الرضع يا جماعة مالوش علاج إلا العملية .. العين مش بتتعدل لوحدها أبداً ..  وكل مانعمل العملية بدري كل ما يكون احسن .. عشان العين الحولة ماتضعفش او تكسل .. وعشان كمان مركز اتحاد العينين في المخ بيتكون في السن الصغيرة دي ..  طيب لازم تعرفوا كمان اننا ممكن نعمل عملية الحول بمنتهى الامان لبيبي عند 4 شهور .. وانا دايماً بأقول نتايج العمليات عند البيبيهات دول ممتازة .. عينيهم بتتعدل تماماً بعد العملية ويفضلوا طول عمرهم كويسين .. زي عملية أروى كده .. عينها اتعدلت تماماً .. دي صورتها بعد العملية بيومين ..

صحيح بقت زي القمر .. لكن في الحقيقة يا جماعة .. هي قبل العملية كانت قمر برضه ..  

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders