اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 11



    
 

 

حالة هذا الاسبوع ( 54 ) هداية .. 9 سنوات .. من دمنهور

" الحول هيرجع تاني .. اوعي تعملي العملية لبنتك "

 هداية البنت الأمورة دي..  جت لي النهاردة بعد 5 سنين من العملية .. هداية كبرت .. عندها 9 سنين دلوقتي .. شكلها ماتغيرش .. زي ما هي بالظبط .. افتكرتها على طول .. بس اول ما شفتها زي القمر كده حبيت اكلمكم عن موضوع مهم قوي باسمعه تقريباً من معظم الأمهات اللي بيجيبوا لي ولادهم اكشف عليهم

مامة هداية لما جابتها لي .. كان هداية ساعتها عندها 4 سنين .. كان عندها حول انسي خلقي .. يعني تقريبا ً اتولدت كده .. مامتها راحت لدكاترة كتير قبلي في دمنهور .. كلهم قالوا لها نفس الكلام .. الحول الانسي الخلقي ملوش علاج الا العملية ..

انا دلوقتي هاكتب لكم الحوار الافتراضي اللي حصل بيني وبين مامتها من 5 سنين .. اكيد هو ده اللي حصل .. تقريباً كل الامهات بيقولوا نفس الكلام

-        هداية محتاجة عملية يافندم

-        مفيش حل تاني يا دكتور جمال .. نظارة .. تمارين .. أي حاجة غير العملية ؟

-        مفيش يافندم والله .. لازم عملية

-        طيب ممكن نستنى لما تكبر شوية

-        مينفعش يافندم .. لازم نعملها دلوقتي .. الانتظار غلط .. البنت نظرها هيضعف .. الحول بيضعف النظر يافندم

-        انا خايفة من العملية يا دكتور جمال

-        خايفة من ايه ياستي .. العملية كلها بتاخد ساعة .. بعدها تاخدي بنتك وتروحي من المستشفى .. تحطي لها قطرة اسبوعين كده .. وخلصت القصة .. خايفة من ايه ؟

-        الناس كلها بتقولي الحول هيرجع تاني .. اوعي تعملي العملية لبنتك .. كل العيال اللي عملوا العملية الحول رجع لهم تاني

طبعاً ياجماعة الكلام ده مش مظبوط أبداً .. معقول كل اللي بيعمل عملية حول .. الحول بيرجعله تاني !! .. هو ده كلام يعقل .. طبعاً فيه نسب مئوية متعارف عليها طبياً لرجوع كل نوع من انواع الحول .. نسب قليلة جداً .. مش بالشكل اللي بنسمعه ده ابداً

الحول الانسي اللي بييجي للاطفال الرضع بالذات زي اللي عند هداية .. نسبة رجوع الحول بعد العملية نسبة بسيطة جداً .. من كل 10 اطفال بنعملهم العملية .. 2 بس ممكن يرجع لهم الحول ويحتاجوا عملية تانية عشان الحول يتعدل .. و8 اطفال الحول يتعدل عندهم من اول مرة ويكملوا حياتهم بعد كده طبيعيين جداً وميرجعش الحول عندهم تاني ابداً

زي هداية .. القمر اللي قدامكم دي .. عملتلها العملية من خمس سنين .. عمليتها نجحت الحمد لله .. وكانت من الاطفال اللي الحول مش هيرجع لهم تاني ابداً .. ونظرها الحمد لله ستة على ستة وهتكمل حياتها ان شاء الله .. زي مانتم شايفين كده .. بنت طبيعية تماماً 

انا حبيت بس استغل فرصة زيارة هداية بعد السنين الطويلة دي عشان اصحح المقولة الغريبة دي اللي باسمعها من امهات كتير " كل العيال اللي بيعملوا عملية بيرجع لهم الحول تاني "

د. جمـال صبحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders