اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 14



    
 

حالة هذا الأسبوع ( 98 ) دارين صلاح  .. سنة ونصف .. من أسوان

نقول تاني وتالت ورابع لكل أم .. لما البيبي بتاعك يظهر عنده حول انسي يعني عينه تخش لجوه زي دارين كده في اول 6 شهور من عمره يبقى لازم تكشفي عليه فوراً .. إوعي تصدقي اللي يقول لك ان كل العيال بيتولدوا كده.. لأ طبعاً .. مش كل العيال بيتولدوا كده .. ده كلام غلط .. بصي حواليكي مش هتلاقي كل العيال كده ولا حاجه .. البيبي بتاعك بس هو اللي كده .. وإوعي تصدقي اللي يقول لك بكره عينه هتتعدل لوحدها .. انا ابني كان كده وعينه اتعدلت لوحدها .. برضه غلط .. الحول ممكن يتعدل لوحده فعلاً لحد الشهر الرابع بس .. لكن ما دام الحول استمر بعد الشهر الرابع يبقى مش هيتعدل لوحده خلاص .. لازم تروحي لدكتور وتشوفي الحول ده هيتعدل إزاي

يا جماعة الحول الانسي للاطفال الرضع .. أو ساعات بنسميه الحول الأنسي الخلقي ملوش علاج إلا العملية .. ملوش علاج تاني .. وكل مانعمل العملية بدري كل ما كان احسن .. عشان العين الحوله ماتضعفش او تكسل .. وعشان كمان مركز اتحاد العينين في المخ بيتكون في السن الصغيرة دي ..  وانا دايماً بأقول نتايج العمليات عند البيبيهات دول بتكون ممتازة .. وعادة بيحتاجوا عملية واحده عينيهم بتتعدل بعدها على طول .. زي عملية دارين كده .. عينها اتعدلت تماماً .. دي صورتها بعد العملية .. شكلها اتغير فعلاً

حمد الله على سلامتك يا دارين .. والف مبروك يا حبيبتي

د. جمــال صبـــحي     

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders