اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 15



    
 

حالة هذا الأسبوع ( 101 ) ساندي جلال عثمان  .. 11 شهر .. من المنوفية

من سنتين تقريباً البنوته القمر دي .. الآنسه ساندي دلوعة باباها كشفت عندي في العياده

·     من إمتى ساندي عندها الحول ده يا جلال

·     تقريباً من أول الشهر الرابع يا دكتور جمال

·     طيب عملتوا ايه .. كشفتوا فين

·     في الحقيقه معملناش حاجه .. احنا قلنا نستنى يمكن الحول يروح لوحده زي ما الناس بتقول .. شهر في التاني الحول ماراحش ولا حاجه .. ده انا حاسس انه زاد عن الأول

·     الحول اللي بييجي في السن ده يا جلال اسمه الحول الانسي للأطفال الرضع .. أو الحول الأنسي الخلقي .. ساعات قليلة بنلاقي الطفل عنده طول نظر وفي الحاله دي بنعمل نضاره والحول بيتعدل .. بس في الغالب مش بنلاقي طول نظر عند البيبيهات دول وفي الحاله دي بنعمل عمليه عشان نعدل الحول

·     انا قريت الكلام ده على صفحتك .. لكن في الحقيقه انا خايف جداً من موضوع العمليه .. انا مش قادر اتصور ازاي نعمل عمليه لبنت في السن دي .. دي لسه ماكملتش سنه

المهم .. بعد ما ساندي حطت قطرة توسيع فحصت قاع العين .. لقيت قاع العين سليم ومفيش طول نظر ولا حاجه .. البنت يا جماعه فعلاً محتاجه عمليه .. مفيش حل تاني .. بس واضح ان جلال باباها هيعارض بشده .. شكله متعلق بيها أوي .. تقريباً هو اللي شايلها على طول مش مامتها .. بيبوسها ييجي عشرين بوسه في الدقيقة .. غرام واضح جداً .. والبنت كمان لازقه فيه .. مش عايزه تسيبه أبداً

·     مفيش طول نظر يا جلال .. وقاع العين سليم .. الحول ده مش هيتعدل إلا بعمليه .. ده ضعف في عضلات العين زي ما توقعت .. ساندي عندها الحول الأنسي للأطفال الرضع

·     طيب مش ممكن نستنى شويه يا دكتور جمال لما البنت تكبر شويه .. مش هاقدر اعملها عمليه دلوقتي

·     بص يا جلال .. الحول ده ملهوش علاج إلا العمليه .. كتير من الأبهات يقولوا لي مانستنى شويه يمكن الحول يتعدل لوحده ... أو مانستنى شويه لما البنت تكبر عشان تستحمل العمليه .. ده كلام مش صح والله .. كده احنا بنضر البنت مش بنفيدها .. يا جلال الحول الانسي الخلقي مش بيتعدل لوحده أبداً .. مهما استنيت برضه حتعمل العمليه .. بس كل مانعملها بدري كل ما كان احسن عشان العين الحوله ماتضعفش أو تكسل .. عشان نحافظ على العين من الضعف والكسل يبقى لازم نعمل العمليه دلوقتي مش بكره

جلال كان أب شجاع .. اخد القرار الصحيح وفوراً لقيته بيقولي على بركة الله .. نعمل العمليه

ساندي عملت العملية تاني يوم .. الحمد لله الحول اتعدل .. وكده هتكبر وعينيها سليمه ومش هيحصل فيها أي ضعف أو كسل ان شاء الله

النهارده بعد سنتين من القصه دي لقيت جلال عثمان داخل عليا العياده ومعاه بنت زي القمر .. مش ممكن .. دي ساندي فعلاً .. آنسة أموره جداً .. انا مش مصدق .. البنت حلوة أوي وعينيها زي الفل .. شكراً يا استاذ جلال .. حضرتك اخدت القرار الصح في الوقت الصح .. وأهي النتيجة أهي قدامنا

الحمد لله رب العالمين

يستاهل الحمد

 د. جمــال صبـــحي     

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders