اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 9



    
 

 

حالة هذا الأسبوع ( 127 ) : جنى مختار .. 6 شهور .. من سوهاج

الحول الانسي عند الاطفال الرضع

قبل ما نتكلم عن حالة جنى .. عايز أأكد تاني على معلومه مهمه عايز كل الأمهات يعرفوها .. كل البيبيهات اللي عندهم شهر ولا شهرين ولا تلاته بيكونوا لسه مش عارفين يتحكموا في عينيهم وساعات عينيهم تحول.. دي حاجه عاديه جداً .. الحول في السن دي ميقلقش أبداً .. دي حاجه طبيعيه خالص عند بيبيهات كتير .. نبتدي نقلق امتى ؟ .. لو البيبي عدا 4 شهور ولسه عنده حول .. لأ .. هنا ياجماعه لازم نكشف .. في السن دي الحول مش طبيعي أبداً.

نقول كمان " أي بيبي عنده حول بعد الشهر الرابع لازم نكشف عليه .. ده مش طبيعي .. ده فعلاً عنده حول "

المهم .. حالة النهارده .. جنى عندها حول انسي بدأ من الشهر التاني .. مامتها جت لي وهي لسه عندها شهرين قلقانه جداً  .. قلت لها استني لحد أما تكمل الشهر الرابع ونشوف .. يا إما تكون حاجه طبيعيه والحول يروح لوحده زي معظم البيبيهات .. إنما لو كملت الشهر الرابع ولسه الحول موجود يبقى لازم اشوفها تاني

وفعلاً جنى جت لي تاني .. عندها دلوقتي 6 شهور .. لسه عندها حول .. الحول ده اسمه " الحول الانسي عند الاطفال الرضع " .. انسي يعني العين حوله لجوه ناحية الأنف   .. ده أشهر انواع الحول عند البيبيهات .. بنشوفه كتير قوي .. ساعات بنسميه " الحول الانسي الخلقي "  .. أول حاجه بنعملها اننا بنفحص قاع العين ونفحص انكسار العين وحاجات تانيه كده عشان نتأكد انه فعلاً حول انسي خلقي

الحول ده ملهوش علاج إلا العمليه ..  مش بيتعدل لوحده أبداً .. مهما استنيتوا برضه هتعملوا العمليه .. وكل مانعمل العمليه بدري كل ما يكون أحسن عشان العين الحوله ماتضعفش أو تكسل

طيب إمتى نقدر نعمل العمليه ؟ .. أو في الشهر الكام بالظبط مسموح طبياً بعمل العمليه ؟

احنا نقدر نعمل عملية حول من أول الشهر الرابع بدون أي خوف على الطفل .. بالعكس ده كل ما نعمل العمليه بدري كل ما قدرنا نحافظ على النظر ونمو مركز الإبصار بصوره طبيعيه في السن المهمه دي.

المهم كشفت على جنى .. عندها فعلاً حول انسي خلقي .. شرحت لمامتها كل الكلام اللي انا كاتبه فوق .. قلت لها لازم نعمل العمليه دلوقتي .. لازم عين جنى تتعدل .. مينفعش نسيبها حوله كده .. الموضوع مش موضوع شكل والبنت مش أموره وكده .. لأ .. الموضوع مش كده خالص ياماما .. البنت لو قعدت كده العين الحوله هتضعف وتكسل .. لازم نعدلها عشان ترجع تبص وتشوف مع العين التانيه ..

اتفقت مع مامتها نعمل العمليه تاني يوم الصبح .. دي صورة جنى بعد العمليه بأسبوعين .. بسم الله ما شاء الله .. الحمد لله عمليتها زي الفل .. مفيش أي مشكله

حمد الله على سلامتك يا حبيبتي .. والف الف مبروك...

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders