اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 19



    
 

حالة هذا الأسبوع ( 143 ) جنى عبد المعين .. سنه ونص .. من البحيرة

" الحول الانسي الخلقي "

عايز اقول لكم الأول أشهر كلام أم جنى سمعته قبل ماتيجي عندي :

* واحدة جارتها: " عيله عندها سنه هتعملي لها عمليه في عينها .. انتي اتجننتي "

* حماتها: " كل العيال بيتولدوا عينيهم حوله كده وبعدين بتتعدل لوحدها "

* أمها ( جدة جنى ): " يا بنتي اعقلي .. دي لسه صغيره جدا .. حتعملولها عملية في عينها ازاي "

* واحده قاعده جنبها عند دكتور الاطفال : " مش بيبان دلوقتي .. استنوا لما يبقى عندها سنتين تلاته كده وبعدين اكشفوا عليها "

* واحده تانيه فاعلة خير : " يا بنتي حتى لو عملتلها العملية دلوقتي .. عينها هتحول تاني بعد شويه .. اسأليني انا .. اوعى حد يلعب في عين بنتك الا لما تكبر .. على دخول المدرسة كده "

******

طيب هاقول للمره المليون كلام سمعتوه مني قبل كده ..

يا جماعه الحول الانسي الخلقي هو اشهر انواع الحول عند البيبيهات .. يعني تقريباً نص البيبيهات إللي عندهم حول بنلاقي عندهم حول انسي خلقي .. عينيهم بتخش لجوه .. زي جنى كده

يا جماعه الحول الانسي الخلقي ملهوش علاج إلا العمليه .. مش بيتعدل الا بعمليه .. مش بيتعدل بأي طريقه تانيه

يا جماعه الحول الانسي الخلقي مش بيتعالج بالنضاره .. اللي بيتعالج بالنضاره نوع تاني خالص اسمه حول طول الظر مش الحول ده

كتير من الامهات يقولوا لي طيب نستنى شويه لما البنت تكبر يمكن الحول يتعدل لوحده ... أو مانستنى شويه لما تبقى تكبر عشان تستحمل العمليه

غلط يا جماعه .. اكبر غلط .. كل منعمل العمليه بدري يكون احسن .. مركز الابصار في المخ بيتكون في الشهور الاولى من العمر .. لازم العين تبقى معدوله في السن دي .. لازم

يا جماعه الحول الانسي الخلقي مش بيتعدل لوحده أبداً .. مهما استنيتوا برضة حتعملوا العمليه .. لازم نعملها بدري عشان العين الحوله ماتضعفش او تكسل .. وصدقوني نتايج العمليات عند الاطفال دول ممتازه .. زي عملية جنى كده ...

مامة جنى فلاحه مصريه جدعه من البحيرة .. ست عشرة على عشرة .. شافت حالات هذا الاسبوع عن الحول الانسي الخلقي اللي على صفحتي .. اقتنعت بكلامي ده جداً .. جابت لي بنتها العياده من اسبوع .. بنت أموره جداَ بس آخر شقاوه .. فحصتها .. حول انسي خلقي فعلاً زي ما مامتها قالت ..  

" جنى محتاجه عمليه يا مدام " ...

" توكل على الله يا دكتور جمال " .. بالشجاعه دي وبالبساطه دي ..

النهارده جنى جت لي بعد العملية باسبوع .. ايه الجمال ده .. الحمد لله .. عمليتها حلوه أوي

" تسلم ايديك يا دكتور جمال "

" تسلمي انتي يا مدام .. قرارك صح .. في الوقت الصح .. ده الحب الصح .. والخوف على الولاد الصح .. "

نصيحه لكل ام عندها طفل زي جنى

" متخليش حبك لبنتك وخوفك عليها يضرها ويأذيها طول حياتها .. الحب والخوف والحرص الحقيقي على الولاد اني احل مشكلتهم .. مش اني اخدهم في حضني واقعد اعيط جنبهم "

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders