اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 20



    
 

حالة هذا الأسبوع  ( 148 )  سين ميم .. 3 سنين ونص .. من المنيا

" الحول الأنسي للأطفال والكسل الوظيفي  "

بمناسبة حالة سين ميم عايز اتكلم النهارده عن اهمال علاج الحول الانسي عند الأطفال

مامة سين ميم كانت عندي في العياده من 4 شهور تقريباً

أنا :  الحول ده عندها من إمتى يا ماما ؟

مامتها : الحول ظهر وهي لسه بيبي عندها 5 شهور

أنا : طيب سبتيها ليه 3 سنين كده يا ماما .. كتير أوي 3 سنين نسيب عين حوله كده .. العين دي اكيد ضعفت جداً .. حصل عندها كسل وظيفي أكيد ؟

مامتها : لا والله ما سبناها .. رحنا بيها لدكاتره كتير .. كلهم قالوا محتاجه عمليه .. قلنا نسيبها لما تكبر شويه ونبقى نشوف حل

قمت كشفت على سين ميم .. لقيت فعلاً عندها العين اليمين ممتازه .. سته على سته .. بس الشمال الحوله نظرها ضعيف جداً .. طبعاً البنت بقالها 3 سنين مركزه طول الوقت على العين السليمه .. فالعين الشمال ضعفت  وبقى نظرها وحش قوي وكمان ظهر فيها الحول اكتر .. وكل شويه الضعف هيزيد والحول برضه هيزيد

أنا : طيب يا مدام .. بنتك محتاجه حاجتين مع بعض .. ولازم يتعملوا مع بعض .. مينفعش نعمل حاجه منهم ونسيب التانيه ..  أول حاجه .. لازم نغطي العين السليمه وتبص بالعين الضعيفه بس حوالي 3 ساعات في اليوم عشان ننشط نظر العين دي .. التغطيه يامدام هي اللي هتحسن النظر في العين الكسلانه .. والحاجه التانيه لازم نعدل الحول ده بعمليه .. لأن الحول اللي عند سين ميم اسمه الحول الانسي للاطفال الرضع وده علاجه عمليه ملهوش علاج تاني .. ولازم لازم الحول يتعدل لأن لما العين نظرها يتحسن مع التغطيه .. الحول هيخلي العين تضعف تاني .. يبقى لازم نعمل الحاجتين مع بعض .. مينفعش نعمل حاجه واحده .. لازم ننشط النظر ولازم برضه نعدل الحول

المهم .. عملت لسين ميم العمليه والحول اتعدل تماماً   .. بعد العمليه على طول بدأنا جلسات التنشيط .. بعد 3 شهور من التغطيه .. سين ميم جاتلي تاني ولقيت الحمد لله نظر العين الشمال اتحسن جداً .. يعني البنت بقت زي الفل خلاص مفيش حول وكمان نظرها ممتاز .. دي صورتها دلوقتي .. حاجه تانيه خالص .. شكلها بقى قمر ..

الف مبروك يا بنتي وحمد الله على السلامه

د. جمــال صبحــي




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders