اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 21



    
 

حالة هذا الأسبوع ( 156 ) سهيلة القاضي .. 5 شهور .. من كفر الشيخ

" الحول الانسي للأطفال الرضع "

البنت العسولة دي مامتها جت لي بيها من شهر تقريباً .. البنت عندها حول من ساعة ما اتولدت .. هما كشفوا عليها قبل كده عند اتنين دكاترة .. والاتنين قالوا لازم عملية .. الأب والأم مش مصدقين إن فيه عملية بتتعمل لبيبي في السن دي .. الاتنين كانوا رافضين تماماً فكرة العملية ..  والنبي يا دكتور جمال شوف لنا أي حل تاني غير العملية

طيب انا حابب اكلمكم تاني وتالت ورابع عن الحول ده .. الحول الانسي للأطفال الرضع أو الحول الأنسي الخلقي هو اشهر انواع الحول عند البيبيهات .. يعني تقريباً نص البيبيهات إللي عندهم حول بنلاقي عندهم حول من النوع ده

دايماً بأقول للامهات لما البيبي يظهر عنده حول انسي – يعني عينه تخش لجوه باستمرار – في اول 6 شهور من عمره  ان اول احتمال تفكري فيه هو الحول الانسي ده ..

الحول ده يا جماعة ملهوش علاج إلا العملية .. كتير من الامهات يقولوا لي مانستنى شوية لما البيبي يكبر يمكن الحول يتعدل لوحده ... أو مانستنى شوية لما يبقى يكبر عشان يستحمل العملية .. زي سهيلة كدة مامتها وباباها رافضين تماماً عملية لبنتهم ..

 الحول الانسي الخلقي مش بيتعدل لوحده أبداً .. مهما استنيتوا برضه حتعملوا العملية .. كل مانعملها بدري كل ما كان احسن عشان العين الحولة ماتضعفش او تكسل .. دي اهمية اننا نعمل العملية بدري .. الموضوع مش حكاية البنت حولة وشكلها مش حلو وكده .. الموضوع أهم من كده بكتير .. العين الحوله نظرها بيضعف ياجماعة وبيحصل فيها حاجه اسمها كسل وظيفي .. لازم نعدل الحول قبل العين ماتضعف

طيب ايه أصغر سن نقدر نعمل فيه العملية .. طبياً نقدر نعمل عملية الحول من أول عمر 4 شهور .. معقولة الكلام ده يا دكتور جمال .. 4 شهور .. تعمل عملية حول لبيبي عنده 4 شهور .. آه والله 4 شهور .. سهيلة أهي 5 شهور وعملت العملية ونتيجتها زي الفل الحمد لله .. العين اتعدلت .. وكمان حافظنا على نظرها عشان ماتضعفش

وصدقوني نتايج العمليات عند الاطفال دول ممتازة جداً ومبيحصلش منها أي مشاكل

حمد الله على سلامتك حبيبتي والف مبروك

د. جمــال صبـــحي     




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders