اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 22



    
 

حالة هذا الأسبوع ( 169 ) بسنت .. 8 شهور .. من الصعيد

" معقول نعملها عملية في السن دي ؟؟؟ "

طبعاً معقول .. ونعملها في سن أصغر من كده كمان .. مش أحسن لما نسيبها لما تكبر ونظر العين الحوله يضعف .. ونخش في مشكلة كسل العين وضعف النظر .. ونقعد نعالج في الكسل والضعف شهور وسنين .. ويا عالم هيتعالج ولا مش هيتعالج

ياجماعه الحول مش موضوع البنت يا دكتور شكلها مش حلو .. واحنا صعايدة وحضرتك عارف موضوع البنات عندنا وكده .. الحول مش موضوع الشكل والمنظر بس .. ولما البنت تكبر نبقى نعملها عمليه ونعدل الحول وخلاص .. لأ .. الموضوع أكبر من كده .. صحيح الشكل حاجه مهمة جداً .. لكن النظر والشوف أهم من الشكل .. أهم بكتير .. لازم نعدل العين الحوله دي لأن نظرها هيضعف جداً .. وكل أما نعمل العملية بدري كل أما يكون أحسن 

نقول تاني وتالت ورابع .. لما البيبي يظهر عنده حول انسي - يعني عينه تخش لجوه - في اول 6 شهور من عمره يبقى لازم نكشف عليه فوراً .. اوعوا تصدقوا اللي يقول ان كل العيال كده وعينيهم بتتعدل لوحدها .. لأ طبعاً .. ده كلام غلط في غلط ..  اللي عينه بتتعدل لوحدها ياجماعه ده بيبي عنده اسبوعين تلاته ولسه مش عارف يتحكم في عينيه .. لكن اللي عنده 6 شهور لأ .. ده كبير أوي .. لايمكن عينه تتعدل لوحدها أبداً

الحول ده اتكلمت عليه كتير على صفحتي .. وكلكم طبعاً حفظتم اسمه .. الحول الانسي للاطفال الرضع .. وزي ما قلنا قبل كده .. الحول ده ملوش علاج إلا العملية .. وكل مانعمل العملية بدري كل ما كان احسن .. عشان العين الحولة ماتضعفش او تكسل .. ودايماً بأقول نتايج العمليات عند البيبيهات دول ممتازه .. وعادة بيحتاجوا عملية واحده عينيهم بتتعدل بعدها .. زي عملية بسنت كده .. عينها اتعدلت تماماً .. يعني هتبص بيها زي العين التانية ونظرها هيفضل عشرة على عشرة طول عمرها .. مش كده وبس .. شوفوا صورتها بعد العملية .. شكلها اتغير فعلاً .. حاجة تانية خالص .. البنت ياجماعة زي القمر

حمد الله على سلامتك يا بسنت .. والف مبروك يا حبيبتي

د. جمــال صبـــحي



الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders