اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 24

 

حالة هذا الأسبوع ( 180 ) رؤى مصطفى الشافعي .. سنتين .. من الإسماعيلية

" الحول الانسي للأطفال الرضع "

البنت العسولة دي عندها حول من ساعة ما اتولدت .. كشفوا عليها قبل كده عند دكاترة كتير .. وكلهم قالوا لازم عملية .. الأب والأم مش مصدقين إن فيه عملية بتتعمل لبيبي صغير كده .. الاتنين كانوا رافضين تماماً فكرة العملية ..  والنبي يا دكتور جمال شوف لنا أي حل تاني غير العملية

طيب انا عايز اكلمكم للمرة العشرين عن الحول ده .. الحول ده اسمه الحول الانسي للأطفال الرضع أو الحول الأنسي الخلقي .. وده هو اشهر انواع الحول عند البيبيهات الصغيريين

أي أم تشوف البيبي بتاعها عنده حول زي بتاع رؤى كده .. فأول احتمال نفكر فيه هو الحول الانسي اللي باتكلم عنه النهارده

الحول ده يا جماعة ملهوش علاج إلا العملية .. كتير من الامهات يقولوا لي مانستنى شوية لما تكبر يمكن الحول يتعدل لوحده ... أو مانستنى شوية لما تكبر عشان تستحمل العملية .. زي رؤى كدة مامتها وباباها رافضين تماماً يعملوا عملية لبنتهم

 الحول الانسي الخلقي مش بيتعدل لوحده أبداً .. مهما استنيتوا برضه هتعملوا العملية .. كل مانعملها بدري كل ما يكون احسن عشان العين الحولة ماتضعفش او تكسل .. دي اهمية اننا نعمل العملية بدري .. الموضوع مش حكاية البنت حولة وشكلها مش حلو وكده .. موضوع الشكل مهم طبعاً لكن الموضوع أهم من كده بكتير .. العين الحوله نظرها بيضعف ياجماعة وبيحصل فيها حاجه اسمها كسل وظيفي .. لازم نعدل الحول قبل العين ماتضعف

رؤى أهي عملت العملية أخيراً ..  ونتيجتها زي الفل الحمد لله .. العين اتعدلت .. وكمان حافظنا على نظرها عشان ماتضعفش

وصدقوني نتايج العمليات عند الاطفال دول ممتازة جداً ومبيحصلش منها أي مشاكل

حمد الله على سلامتك ياحبيبتي والف مبروك

د. جمــال صبـــحي     

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders