اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 25



    
 

 

حالة هذا الأسبوع ( 184 ) .. محمد مصطفى عبد الحفيظ 11 سنة .. من كفر الشيخ

 النهاردة في العيادة حصلت لي حاجة من أحلى وأجمل الحاجات اللي بتحصل لي في شغلي .. حاجة تخلي الواحد طاير من الفرح .. حاجة تنسي الواحد تعب السنين وتدي طاقة ايجابية لمواصلة مشوار طويل مجهد من الجد والعطاء .. انا حبيت أكتب عن الحاجة دي .. حبيت انكم تشاركوا معايا اللحظة الجميلة دي

النهاردة دخل عليا العيادة أم ومعاها ابنها الولد اللي زي القمر ده

·     سلم على عمو جمال يامحمد

محمد لف حوالين المكتب وسلم عليا سلام رجالة وباسني

·     مش فاكر محمد يا دكتور جمال .. محمد مصطفى عبد الحفيظ .. بتاع كفر الشيخ .. انت عملتله العملية وهو عنده سنة و8 شهور .. سنة 2010 .. يعني من 9 سنين .. انا جاية اطمن عليه .. المدارس كمان اسبوعين وعايزه أطمن على نظره .. انا قلت محدش هيشوفوا غيرك

 لحظات قعدت باصص لمحمد .. باصص لوشه .. لعينيه .. بصراحة ياجماعة مش فاكره خالص .. 9 سنين كتير برضه .. وأنا طبعاً كبرت .. المهم .. فتحت الكمبيوتر .. ملف صور المرضى .. حرف الميم .. انا باحتفظ بصور كل العيانين بتوعي .. ( بالمناسبة انا عندي صور عيانين من زمان قوي .. من قبل حتى مايخترعوا الكاميرا الديجيتال .. ايام ما كنا بنطبع الصور في الاستوديو .. عندي الصور دي لحد دلوقتي )

المهم قعدت أدور .. محمد .. محمد .. محمد مصطفى عبد الحفيظ .. أهو الملف .. فتحت الصورة .. مش ممكن ياجماعة .. انا الحالات دي بتخليني في منتهى السعادة .. حاجة تفرح بجد .. لقيت صورة طفل بتاع سنتين كده عنده حول انسي .. بقيت عمال أبص شوية لصورة الطفل وشوية أبص لمحمد .. أبص هنا .. وأبص هنا .. مش مصدق والله .. فعلاً يستاهل الحمد .. الحمد لله رب العالمين  

محمد كان عنده الحول المشهور اللي احنا بنسميه الحول الانسي الخلقي .. وزي ما قلت لكم قبل كده .. الحول ده هو اشهر انواع الحول عند الأطفال الصغيرين .. ودايماً بأقول للامهات لما البيبي يظهر عنده حول انسي زي اللي كان عند محمد كده .. فأول احتمال لازم تفكروا فيه هو الحول الانسي الخلقي .. والحول ده زي ماكتبت عنه 100 مرة علاجه عملية .. ملهوش علاج إلا العملية

ودايماً باقول كل مانعمل العملية ونصلح الحول بدري كل ما كان احسن عشان العين الحولة ماتضعفش او تكسل والطفل يكمل حياته طبيعي ومركز الابصار ومركز الاتحاد اللي في المخ ينمو بصورة طبيعية .. والولاد دول اللي عملنا لهم عملية وهما بيبيهات بنشوفهم لما يكبروا ونفحص عينيهم بنلاقيهم طبيعيين تماماً .. كأنهم مكنش عندهم حول أصلاً .. 

وصدقوني نتايج العمليات عند الاطفال دول ممتازة .. زي عملية محمد كده ... عينيهم بتتعدل وما يحتاجوش عمليات تاني أبداً ويكملوا حياتهم زي أي طفل طبيعي

" أي حد بيعمل العمليه الحول بيرجعله تاني "

 ده أشهر تعليق بيتكتب أسبوعياً على صور العيانين اللي بانزلها على صفحتي قبل وبعد ما عملوا العملية .. وأنا مش بأحذف التعليقات دي وأكيد طبعاً كلكم بتقروها

أحسن رد أطمن بيه الناس اللي بتكتب كده على صفحتي هي صورة محمد لما عملت له العملية سنة 2010 لما كان عنده سنتين وصورته دلوقتي بعد 9 سنين من العملية عشان نشوف ازاي انه بسم الله ما شاء الله زي الفل والحول مرجعش ولا حاجة .. مش كده وبس لقيت نظره الحمد لله في عينيه الاتنين 6/6 وعينيه طبيعية تماماً

الحمد لله رب العالمين

وشكراً جداً يامامة محمد انك سمعتي كلامي وعملتي العملية لمحمد في الوقت الصح .. والنتيجة باينة دلوقتي قدامك أهو .. ربنا يخليهولك يافندم ويبارك فيه

د. جمــال صبـــحي     

 

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders