اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 26



    
 

حالة هذا الأسبوع ( 186 ) جنى كرم العارف  .. 3 سنين .. من سوهاج

" الحول الأنسي للأطفال الرضع "

نقول تاني لكل الأمهات .. البيبي وهو لسه مولود مش بيعرف يتحكم كويس في عينيه .. كلنا عارفين كده وعارفين انه طبيعي الطفل المولود ساعات عينه تحول .. دي حاجة طبيعيه وماتقلقش أبداً ..  طيب إمتى نقلق ؟ .. إمتى نقول ان ده حول فعلاً ولازم نروح لدكتور وإمتى نقول دي حاجه عاديه ؟

 طيب إحفظوا عني التاريخ ده .. الشهر الرابع .. هو ده الحد الفاصل .. أي بيبي ياجماعة عينه بتحول وعمره أكبر من 4 شهور يبقى مش طبيعي .. ولازم نكشف عليه .. أشهر نوع من انواع الحول عند البيبيهات في السن دي هو الحول الأنسي للأطفال الرضع .. نلاقي البيبي عينه تخش لجوه .. ساعات الحول يكون في عين واحده .. وساعات الحول يبدل .. يعني شويه باليمين وشويه بالشمال      

ونقول تاني لكل الأمهات .. إوعي تصدقي اللي يقول لك بكره عينها هتتعدل لوحدها .. انا بنتي كانت كده وعينها اتعدلت لوحدها .. صحيح الحول ممكن يتعدل لوحده فعلاً بس لحد الشهر الرابع بس .. لكن ما دام الحول استمر بعد الشهر الرابع يبقى مش هيتعدل لوحده خلاص .. ده مش الحول الطبيعي اللي عند البيبيهات المولودة .. بعد الشهر الرابع اسمه الحول الأنسي للأطفال الرضع

والحول ده ملهوش علاج إلا العملية .. ملهوش علاج تاني .. وكل مانعمل العملية بدري كل ما كان أحسن .. عشان العين الحوله ماتضعفش او تكسل .. وعشان كمان مركز اتحاد العينين في المخ بيتكون في السن الصغيره دي ..

جنى مامتها وباباها جابوهالي من سوهاج .. الحول ده بدأ عندها من عمر شهرين .. راحوا بيها للدكاترة قالوا لهم دي حاجة طبيعية عند البيبيهات منقدرش نحكم دلوقتي عندها حول ولا لأ .. لازم نستنى لحد الشهر الرابع عشان نحكم .. وكلامهم صح طبعاً .. جنى دلوقتي عندها 3 سنين  .. يعني عدت الشهر الرابع بكتير أوي .. جنى عندها الحول الأنسي للأطفال الرضع .. قلتلهم لازم نعمل عمليه .. مفيش حل تاني 

المهم عملت العملية لجنى من كام يوم .. جت النهارده .. عينها لسه حمرا شوية .. بس الحول اتعدل تماماً .. دي صورتها بعد العمليه .. زي القمر .. بصراحة ياجماعة جنى حتى وهي حوله كانت برضه زي القمر .. الحمد لله

ألف حمد الله على سلامتك يا بنتي

د. جمــال صبـــحي     

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders