اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع  28

حالة هذا الأسبوع ( 192 ) نهى الفولي  .. 3 سنين .. من المنيا

" الحول الأنسي عند الأطفال "

مامة نهى قالت لي ان الحول ظهر عند نهى وهي عندها شهرين .. كل الناس قالوا لها متخافيش .. عيال كتير بيحولوا كده وبعدين عينيهم بتتعدل لوحدها

فرصه النهارده قبل منخش في موضوع نهى نشرح الموضوع ده .. هو صحيح البيبيهات اللي عندهم حول عينيهم بتتعدل لوحدها ؟ ..

طيب .. البيبي وهو لسه مولود مش بيعرف يتحكم في حركة عينيه .. كلنا عارفين كده وعارفين انه طبيعي الطفل المولود ساعات عينه تحول .. دي حاجة طبيعيه وماتقلقش أبداً ..  طيب إمتى نقلق ؟ .. إمتى نقول ان ده حول فعلاً ولازم نروح لدكتور وإمتى نقول دي حاجه عاديه ؟

أي بيبي عينه بتحول وعمره أكبر من 4 شهور يبقى مش طبيعي .. ولازم نكشف عليه .. لكن لو بيظهر عنده حول ولسه مكملش 4 شهور يبقى ممكن يكون طبيعي وعينه هتتعدل لوحدها  .. لكن لو الحول استمر بعد الشهر الرابع يبقى مش هيتعدل لوحده خلاص .. ده مش الحول الطبيعي اللي عند البيبيهات المولوده .. بعد الشهر الرابع يبقى لازم نكشف عليه .. خلاص كده

الكلام ده لكل الأمهات اللي يومياً يبعتولي رسايل وهما قلقانين جداً :

·     ابني عنده 10 ايام وبيحول  اعمل ايه اروح فين

·     ابني عنده شهر وبيحول والدكتور قال استني شويه

·     ابني عنده 3 شهور وبيظهر عنده حول .. اعمل ايه

خلاص يا جماعه .. قبل الشهر الرابع محدش يسألني عن الحول .. على طول هأقوله استنى شويه

نهى بقى الحول ده بدأ عندها من عمر شهرين .. راحوا بيها للدكاتره قالوا لهم دي حاجه طبيعيه عند البيبيهات منقدرش نحكم دلوقتي عندها حول ولا لأ .. لازم نستنى لبعد الشهر الرابع عشان نحكم .. وكلامهم صح طبعاً .. نهى دلوقتي عندها 3 سنين  .. يعني عدت الشهر الرابع بكتير أوي .. نهى عندها الحول المشهور اللي كلكم عارفينه .. الحول الأنسي للأطفال الرضع  .. وزي ماكلكم عارفين الحول ده ملهوش علاج إلا العمليه .. ملهوش علاج تاني .. وكل مانعمل العمليه بدري كل ما كان أحسن .. عشان العين الحوله ماتضعفش او تكسل ..

قلتلهم لازم نعمل عمليه .. مفيش حل تاني

المهم .. عملت العملية لنهى من كام يوم .. جت النهارده استشاره .. الحول اتعدل تماماً .. دي صورتها بعد العمليه .. زي القمر .. الحمد لله

ألف حمد الله على سلامتك يا بنتي

د. جمــال صبـــحي

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders