اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع  29


    
 

حالة هذا الأسبوع ( 195 ) جويرية عبد السلام .. 7 شهور .. من طنطا

" الحول الانسي للأطفال الرضع "

البنت العسولة الزعلانه دي مامتها جت لي بيها من شهر تقريباً .. جويرية ظهر عندها الحول وهي عندها شهرين .. مامتها كشفت عليها قبل كده .. كل الدكاتره قالوا الحول ده علاجه عمليه .. ملهوش علاج تاني .. الأب والأم مش مصدقين إن فيه عمليه بتتعمل لبيبي في السن دي .. الاتنين كانوا رافضين تماماً فكرة العمليه ..  والنبي يا دكتور جمال شوف لنا أي حل تاني غير العمليه

طيب .. الحول ده يا جماعه اسمه الحول الانسي للأطفال الرضع .. بيظهر في أول 6 شهور بعد الولاده .. لما بنكشف على الأطفال دول بنلاقي قاع العين سليم ونظرهم سليم وسبب الحول ده بيكون ضعف في عضلات العين .. وعلاج الحول ده عمليه فعلاً .. ليس له علاج آخر

 طيب لو سبنا البيبي بالحول ده شويه كده

لحد أما يكبر .. هيحصل ايه ؟

ده بقى أكبر غلط .. كل مانعمل العمليه ونعدل الحول بدري كل ما كان احسن عشان العين الحوله متضعفش او تكسل .. دي أهمية اننا نعمل العملية بدري .. الموضوع مش حكاية البنت حوله وشكل جويرية مش حلو وكده .. موضوع الشكل مهم طبعاً لكن الموضوع أهم من كده بكتير .. العين الحوله نظرها بيضعف ياجماعه وبيحصل فيها حاجه اسمها كسل وظيفي .. لازم نعدل الحول قبل العين ماتضعف

طيب ايه أصغر سن نقدر نعمل فيه العمليه ؟

 طبياً نقدر نعمل عملية الحول من أول عمر 4 شهور .. معقول الكلام ده يا دكتور جمال .. 4 شهور .. تعمل عملية حول لبيبي عنده 4 شهور .. آه والله 4 شهور .. جويرية أهي 7 شهور وعملت العمليه ونتيجتها زي الفل الحمد لله .. العين اتعدلت .. وكمان حافظنا على نظرها عشان ماتضعفش

طيب هو الطفل بيحتاج عمليه واحده وعينه تتعدل ؟

 معظم البيبيات فعلاً عينيهم بتتعدل من عمليه واحده .. قليل أوي منهم بيحتاجوا عمليه تانيه عشان الحول يتعدل .. مش مشكله .. ساعات بتحصل

دي صورة جويرية بعد العمليه

لسه برضه زعلانه .. بس الحول راح الحمد لله وعينيها اتعدلت تماماً .. وبقت زي القمر

حمد الله على سلامتك حبيبتي والف مبروك

د. جمــال صبـــحي     

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders