اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 3

 

حالة هذا الأسبوع : مليكة هاني 5 شهور .. من الشرقية

الحول الانسي الخلقي

أولاً إليكم بعض الأقوال المأثورة اللي اتقالت لأم مليكة :

* واحدة جارتها: " انتي هبلة .. عيلة عندها 5 شهور حتعملوا لها عملية في عينها "

* حماتها: " ياختي اتهدي كل العيال عينيهم كانت حولة كدة وبعدين اتعدلت لوحدها "

* أمها ( جدة مليكة ): " يا بنتي اعقلي .. دي لسه حتة لحمة .. حتعملولها عملية في عينها ازاي "

* دكتور اطفال جنبهم: " مانقدرش نقول عندها حول ولا لأ .. دي لسه عندها 5 شهور يا مدام .. استنوا لما يبقى عندها سنتين كدة وبعدين اكشفوا عليها "

* دكتور تاني حبيبنا: " يا بنتي حتى لو عملتلها العملية دلوقتي .. عينها حتحول تاني بعد شوية .. اوعى حد يلعب في عين بنتك الا لما تكبر .. على دخول المدرسة كدة "

******

يا جماعة الحول الانسي الخلقي هو اشهر انواع الحول عند البيبيهات .. يعني تقريباً نص البيبيهات إللي عندهم حول بنلاقي عندهم حول انسي خلقي ..

يا جماعة الحول الانسي الخلقي ملوش علاج إلا العملية .. كتير من الامهات يقولوا لي مانستنى شوية لما البنت تكبر يمكن الحول يتعدل لوحده ... أو مانستنى شوية لما تبقى تكبر عشان تستحمل العملية

غلط يا جماعة .. اكبر غلط .. لو قدرنا نعمل العملية قبل سن 6 شهور يكون احسن .. مركز الاتحاد في المخ بيتكون في اول 6 شهور من العمر .. لازم العين تبقى معدولة قبل السن ده .. لازم

يا جماعة الحول الانسي الخلقي مش بيتعدل لوحده أبداً .. مهما استنيتوا برضة حتعملوا العملية .. كل مانعملها بدري كل ما كان احسن عشان العين الحولة ماتضعفش او تكسل .. وصدقوني نتايج العمليات عند الاطفال دول ممتازة .. زي عملية مليكة كدة ...

مامة مليكة فلاحة من الشرقية .. بس ست عشرة على عشرة .. شافت مقالاتي عن الحول الانسي الخلقي اللي على موقعي ( كتبت على جوجل: الموقع المصري للحول د. جمال صبحي ) اقتنعت بيها جداً .. جتلي من اسبوع العيادة .. انا شفت مليكة .. فحصتها .. حول انسي خلقي ملوش حل .. " مليكة محتاجة عملية يا مدام " ... " توكل على الله يا دكتور " .. كده بالشجاعة دي

النهاردة جتلي مليكة بعد العملية باسبوع .. ايه الروعة دي .. الحمد لله .. " تسلم ايديك يا دكتور جمال .. عملية هايلة والله "

تتسلمي انتي يا مدام .. قرارك صح .. في الوقت الصح .. ده الحب الصح .. والخوف على الولاد الصح ..

نصيحة لكل ام عندها طفل زي مليكة " متخليش حبك لبنتك وخوفك عليها يضرها ويأذيها طول حياتها .. الحب والخوف والحرص الحقيقي على الولاد اني احل مشكلتهم .. مش اني اخدهم في حضني واقعد اعيط جنبهم "

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders