اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 4



    
 

 

حالة هذا الأسبوع 25: احمد اسامة محمود ..7 شهور

من مدينة نابولي .. ايطاليا

الحول الانسي الخلقي

" احمد ده يا جماعة اول حالة بنغزو بيها الاتحاد الاوروبي "

انا مش هابطل اتكلم ابداً عن الحول الخلقي الانسي عند الاطفال الرضع وازاي ان الحول ده منتشر جداً عندنا في مصر .. وازاي انه لازم يتعدل بعملية .. وازاي ان العملية كل ما نعملها بدري كل ما كان أحسن .. ان شا الله نعمل العملية والبيبي عند 4 شهور .. والله مفيش مشكلة .. والنتايج هايلة .. الى آخر الكلام اللي الامهات في كل الدنيا حفظوه مني خلاص ..

نحكي بقى حكاية احمد ايطاليا - ده اسمه زي ما أنا مسجل نمرة مامته على تليفوني -

من سنتين كدة يا جماعة وانا في العيادة جالي تليفون .. نمرة من برة مصر:

- " أيوة يافندم انا الدكتور جمال صبحي .. تحت امرك "

- " انا باكلم حضرتك من ايطاليا .. انا وجوزي بنشتغل هنا في نابولي من سنين .. ابني الصغير احمد يا دكتور جمال عنده 7 شهور بس .. وهو عنده 4 شهور ظهر عنده حول داخلي .. زي ما فهمت من الموقع بتاعك على النت ان ده حول انسي خلقي ( تقصد الموقع المصري للحول وامراض الجهاز الحركي للعين ) .. هنا في ايطاليا العلاج غالي جداً .. واحنا لسه مالناش تأمين صحي .. وانا فهمت من موقعك ان الحول ده مالوش علاج الا العملية وانه لازم يعملها وفي اقرب وقت .. انا مش ها أطمن على احمد الا لو عمل العملية في مصر "

- " الف سلامة عليه يا فندم .. حضرتك ناوية تنزلي مصر امتى "

- " عايزة اسألك يا دكتور جمال احتاج كام يوم في مصر عشان العملية والمتابعة وكده ؟ "

- " والله يافندم اسبوع .. عشر ايام بالكتير .. اشوفه في يوم .. واعمله العملية تاني يوم .. واطمن عليه بعديها باسبوع كده "

بعديها باسبوع قاعد باكشف في العيادة .. دخلت عليا شابة مصرية وشايلة بيبي صغير .. الأم شكلها عادية لابسة الحجاب العادي بتاعنا وكده يعني .. شكلها فلاحة شوية ( الجملة دي عشان الفلاحين اللي بيزعلوا مني ويقولولي مالهم الفلاحين ؟ ) ..

- " انا اللي كلمتك من ايطاليا يا دكتور جمال .. وده ابني احمد "

- " حمد الله ع السلامة يافندم .. كشفت على الولد .. فعلاً حول انسي خلقي .. الله ينور يامدام .. تشخيصك صح .. عشرة على عشرة .. صورته طبعاً قبل العملية "

عملت العملية لأحمد تاني يوم وقعدت ادعي طول العملية  .. ربنا يطول رقبتنا ويسترنا في ايطاليا ودول الاتحاد الاوروبي المتقدمة

احمد جالي بعد العملية باسبوع .. بسم الله ما شاء الله .. عملية هايلة والله

- " الحمد لله يافندم .. تقدري ترجعي ايطاليا يافندم .. وان شاء الله في اول زيارة ليكي لمصر ياريت تعدي عليا اشوف احمد تاني "

القصة دي يا جماعة بقالها سنتين كده .. النهاردة بقى وانا قاعد في العيادة دخلت عليا شابة .. شكلها مش غريب عليا .. وماسكة في ايدها طفل أمور قوي ورفعته لفوق عشان ابوسه

- " ده احمد بتاع ايطاليا يا دكتور جمال " 

 معقولة .. مين الولد الأمور ده .. مش ممكن تعرف ان الولد ده كان احول في يوم من الايام .. روعة والله

" نفسي يا أم احمد تيجي الأمهات الخايبة اللي خايفين يعملوا العملية لأولادهم يتفرجوا على احمد ايطاليا بعد سنتين من العملية "

( نفسي يا جماعة ومنى عيني أبطل اسمع الحوار الممل ده:

- خايفة من ايه يا مدام

- اصل بيقولوا اللي بيعمل عملية حول .. الحول بيرجع تاني )

تيجي الأمهات دي تتفرج على احمد ايطاليا بعد سنتين من العملية يشوفوا الحول رجع ولا لأ

الحمد لله يا أم احمد .. وربنا يخليهولك

د. جمــال صبــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders