اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 5



    
 

 

حالة هذا الأسبوع ( 32 ) : احمد سامح 7 شهور .. من السيدة زينب

الحول الانسي للأطفال الرضع

" حقك عليا يا مدام .. لازم نخش العمليات بكرة تاني "

بطلة قصة حالة الاسبوع ده اتنين مش بطل واحد .. السيدة الفاضلة الشجاعة مامة احمد سامح .. وجدة احمد ..  الست الطيبة الضحوكة اللي عاملة زي حتة السكرة .. نخش بقى في التفاصيل

من اسبوعين كده دخل عليا العيادة .. شابة وجوزها شايلين بيبي صغنون أوي .. وجاي معاهم ست وشها سمح قوي .. شكلها طبعاً جدة البيبي .. دخول العيادة يا جماعة بالتجمع العائلي الرسمي ده معروف عندي وبيتكرر كتير .. وليه معنى  واضح ان البيبي ده شخصية مهمة جداً في الأسرة .. يعني بالعربي كده .. مش مسموح بأي أخطاء .. يعني بالعربي برضه البيبي الأحول ده هيتعدل يعني هيتعدل .. اظن الرسالة وصلت ..

-                                  خير يا مدام

-                                  التاريخ المرضي العادي للحول الانسي الخلقي اللي كتبته ع الصفحة هنا عشرات المرات .. كل الامهات حفظوه خلاص .. حول انسي ( يعني العين داخلة لجوة ) بييجي في أول 6 شهور من عمر البيبي .. مالوش علاج الا العملية .. تتعمل دلوقتي أفضل من بعدين .. الانتظار مش بيعمل حاجة .. هنعمل العملية هنعملها .. الى آخر الكلام اللي انتو كلكم حفظتوه خلاص ..

قمت فحصت احمد .. حول انسي خلقي ملوش حل ..

-                                  " احمد محتاج عملية يا مدام "

-                                  عارفين والله يا دكتور جمال .. احنا كشفنا عليه قبل كده وقالوا لنا عملية برضه

-                                  نسبة نجاحها كام يا دكتور

-                                  نسبة نجاحها ممتازة يافندم

يومين .. وعملت العملية لأحمد

خرجت بره جناح العمليات بعد العملية لقيت نفس التجمع الرسمي .. الأب والأم والجدة

-                                  ايه الأخبار يا دكتور جمال ؟

-                                  والله الحمد لله يافندم .. العملية مشيت كويس

-                                  النتيجة هتبان امتى ؟

-                                  دلوقتي يا فندم أول ما أحمد يفوق من البنج  النتيجة بتبان .. نص ساعة كده تاخدوه وتروحوا .. الغطا اللي على عينيه يتشال أول ما توصلي البيت  هتلاقي ان شاء الله عينه معدولة .. تحطي له القطرة 5 مرات في اليوم واشوفه في العيادة بعد يومين .. حمد الله على سلامته يافندم

دخلت أوضة العمليات تاني عشان أكمل بقية العمليات اللي عندي .. اليوم ماشي عادي يعني ..

بعد ساعتين كده .. بآخد راحة بين عمليتين .. لقيت على الموبايل

6 Missed Calls

اتصلت بالنمرة ..

-                                  مين يافندم

-                                  انا مامة احمد سامح يا دكتور جمال

-                                  خير يافندم

-                                  روحنا البيت وشيلنا الغطا من على عينيه زي ما حضرتك قلت لنا .. عينين سامح زي ماهي يا دكتور جمال .. حولة زي ماهي .. ماحصلش فيها أي تغيير

-                                  طيب اهدي من فضلك يافندم .. صوري احمد بالموبايل بتاعك وابعتيلي الصورة على الواتس اب دلوقتي

5 دقايق الصورة وصلت على الواتس .. فتحتها .. مش ممكن ياجماعة .. احمد أحول زي ماهو بالظبط .. كأنه ما عملش عملية ولا حاجة

طبعاً يا جماعة النتيجة دي مش بتحصل كتير .. المراجع الطبية كلها بتقول ان حوالي من 3 الى 5 % من البيبيهات بتوع الحول الانسي الخلقي بنلاقيهم كده بعد العملية .. زي ما كانوا بالظبط .. طيب والحل .. كل المراجع الطبية برضه حددت الحل .. عملية تاني فوراً لشد العضلات مرة تانية

انا طبيعتي يا جماعة مش من الدكاترة اللي بتخاف تواجه الحقيقة .. حتى لو كانت صعبة .. عمري ما قلت لعيان عمليته وحشة :

" طيب نستنى شهرين كده يمكن العضلة تقوى ولا حاجة .."

" ولا نستنى شوية يمكن العملية تطبع .."

عمري يا جماعة ماقلت لعيان عمليته وحشة أي كلام من الكلام الفاضي ده اللي لا بيحل ولا يربط

كلامي واضح لكل المرضى :

" نتيجة العملية بتبان بعد ساعة من العملية "

" العين اللي ماتعدلتش .. مش هتتعدل الا بعملية تانية "

******

مسكت موبايلي وكتبت لأم سامح :

" حقك عليا يا مدام .. لازم نخش العمليات بكرة تاني "

معظم المرضى الكلام ده بيبقى صعب أوي عليهم .. خصوصاً لما يكون الكلام على بيبي عنده 7 شهور لسه واخد بنج كلي من كام ساعة

المهم .. وانا قاعد بليل في العيادة لقيت مامة سامح والحاجة جدته داخلين عليا .. زعلانين طبعاً .. لكن الاتنين كانوا في منتهى الشجاعة وفهموا كلامي والنسبة المأوية المكتوبة في الكتب للحالات دي

-                                  طيب مش ممكن نأجلها شوية .. ده لسه واخد بنج امبارح

-                                  - طيب ونأجلها ليه .. هيحصل ايه لما نأجلها .. ياجماعة اطمنوا الولد هيبقى زي الفل ان شاء الله .. اجهزة التخدير و المونيتور دلوقتي بتضمن سلامة كاملة ان شاء الله لكل البيبيهات ..

-                                  معظم الامهات ياجماعة بياخفوا جدا من الكلام ده .. وده حقهم طبعاً .. ومعظمهم بيرفضوا يعملوا عملية تانية فوراً لأولادهم .. قليل لما يلاقي أم شاطرة زي أم احمد سامح .. بعد حوار ودي قصير غير متوقع مع الأم والجدة .. اتفقنا والحمد لله .. العملية بكرة ان شاء الله .. يا مسهل يا رب

-                                  تاني يوم عملت عملية تانية لأحمد .. ونفس الكلام .. أول ماتوصلي البيت يامدام وتشيلي الغطا .. ابعتيلي صورة بالواتس اب

-                                  بعد ساعتين .. تليفون من مامة احمد .. ضحكة في التليفون حلوة قوي .. انا باحب اسمع الضحكة الحلوة دي بعد العملية من الأمهات

-                                  فتحت الصورة الجديدة على الواتس .. الحمد الله .. الحول اتعالج تماماً .. احمد بقى زي القمر والله

" تسلم ايديك يا دكتور جمال "

" حقك عليا يافندم .. تعبتكم معايا .. الحمد لله رب العالمين "

 

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders