اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 6



    
 

 

حالة هذا الأسبوع ( 37 ) : بشرى عمر رضوان .. 6 شهور .. من مرسي مطروح

" الحول الانسي للأطفال الرضع "

مش قادر اقول لكم انا فرحان أد ايه بحالة بشرى .. مش عشان عمليتها حلوة .. لأ الموضوع أكبر من كده .. انا يا جماعة الدعوة بتاعتي انتشرت ووصلت لحدود مصر الغربية .. انا مش مصدق والله اللي حصل ده .. اسمعوا القصة

 من أسبوع كده بليل وانا قاعد في العيادة .. اليوم ماشي عادي .. دخل أوضة الكشف أب وأم معاهم بيبي صغنونة قوي عندها حول ..

ابتدا الأب والأم يحكولي القصة .. اللهجة بدوي .. الأب بالذات كلامه بدوي جميل جداً بس يدوبك قادر أفهمه ..  عامل كده زي كلام ولد الطحاوي في فيلم أبو علي ... والأم كلامها بدوي برضه .. بس يعني مفهوم شوية ..

- ايه ده انتم منين ياجماعة ؟

- من الحمام يا دكتور جمال .. من مرسي مطروح

- أهلا وسهلا يافندم .. حضرتكم قاعدين فين في مصر ؟

- والله احنا لسه واصلين النهاردة .. 12 ساعة سفر والله يا دكتور جمال .. احنا قايمين النهاردة الفجر

- يا عيني .. 12 ساعة سفر .. ليه .. مالها بنتكم يافندم ؟

اسمعوا بقى الرد المفاجأة من أم بشرى الست البدوية من مرسى مطروح

( الدعوة انتشرت يا جماعة )

" بشري بنتنا يا دكتور جمال عندها 6 شهور .. حسب ما انت بتشرح في فيديوهاتك على اليوتيوب فهمنا ان بشرى عندها حول انسي خلقي .. واحنا قرينا على صفحتك في الفيس ان الحول الانسي الخلقي ممكن نعمله العملية من أول سن 4 شهور وعرفنا من الموقع بتاعك على النت ان كل ماعملنا العملية بدري كل ما كان أحسن وشفنا صور الأطفال اللي انت حاططها على الموقع وعلى الصفحة وازاي نسبة نجاح العملية عندهم في السن ده بتبقى هايلة .. احنا عايزين نعمل العملية لبشرى "

ايه اللي انا سامعه ده .. انا مش مصدق وداني والله .. الفيس .. اليوتيوب .. الموقع .. النت .. صفحة مركز علاج الحول .. الحول الانسي الخلقي .. وكمان باللهجة البدوي ..

انا ياجماعة سعادتي لا توصف .. ازاي انا العبد لله الغلبان قدرت أوصل معلومة مهمة زي دي لأم بدوية في آخر حدود مصر الغربية .. ازاي ربنا وفقني والدعوة انتشرت كده .. ازاي قدرت والحمد لله اني أغير المفاهيم الغلط اللي كانت مسيطرة على الناس لسنين طويلة .. ازاي خليت الامهات ما بقوش يصدقوا خلاص الكلام اللي كان بيتقال زمان من أمثلة:

" وايه يعني ما كل العيال عندهم حول كده وبعدين لما يكبروا عينيهم بتتعدل لوحدها "

" حد يعمل عملية لبنت عندها 6 شهور .. دي لسه حتة لحمة "

" اوعي تخلي حد يلعب في عين بنتك "

" كل اللي عملوا العملية .. الحول رجع لهم تاني "

الكلام ده انتهى خلاص .. بدليل أم بشرى .. من الحمام من مرسي مطروح .. والله فاهمة كل حاجة عن الحول الانسي الخلقي زي ما كتب الطب بتقول.

المهم ياجماعة .. عملت العملية لبشرى تاني يوم الصبح .. قالوا لي ممكن نعمل العملية ونسافر على طول .. ولا ده خطر على العملية .. قلت لهم مفيش أي مشكلة طبعاً .. ممكن تسافروا بعد العملية على طول مفيش أي خطورة على العملية

النهاردة بقى في التليفون المفاجأة التانية
- انا أم بشرى يا دكتور جمال

-                                                                             أخبار بشرى ايه طمنيني

-                                                                             - زي الفل يا دكتور .. تسلم ايديك والله .. هو انا لازم آجي من مرسي مطروح عشان تشوفها ولا ممكن أبعت لك صورتها بالواتس آب

-                                                                             واتس آب ياجماعة من الحمام من مرسى مطروح .. بالزمة ليا حق أفرح بالحالة دي ولا لأ

-                                                                             المهم .. جاتني صورة بشرى على الواتس بعد 5 دقايق كده .. ولما بصيت في الصورة عرفت مامتها ليه اتأخرت 5 دقايق .. الفستان والتوكة والتسريحة بقى .. بنات يا جماعة

-                                                                             بشرى بقت قمر .. عمليتها جميلة جداً

-                                                                             - ممكن يافندم احط صورة بشرى على الصفحة في خالة هذا الاسبوع

-                                                                             - طبعاً ممكن .. بس ثانية واحدة أحط لها التوكة وأظبط لها شعرها

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders