اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 7



    
 

 

حالة هذا الأسبوع ( 44 )  فارس وليد .. من القناطر الخيرية

الحول الانسي الخلقي

النهاردة دخل عليا العيادة أم شابة ومعاها طفل صغير بتاع اربع خمس سنين كده

·     سلم على عمو جمال يافارس

فارس لف حوالين المكتب وسلم عليا سلام رجالة وباسني

·     مش فاكر فارس يا دكتور جمال .. فارس وليد .. انت عملتله العملية وهو عنده 7 شهور .. انا جاية اطمن عليه .. هو داخل المدرسة السنة الجاية ان شاء الله

بصيت لفارس شوية .. بصراحة ياجماعة مش فاكره .. فتحت الكمبيوتر .. ملف صور المرضى .. حرف الفاء .. انا باحتفظ بصور كل المرضى .. بالمناسبة انا عندي صور مرضى من زمان قوي .. من قبل حتى مايخترعوا الكاميرا الديجيتال .. ايام ما كنا بنطبع الصور في الاستوديو .. عندي الصور دي لحد دلوقتي

المهم قعدت على الكمبيوتر أدور .. فارس .. فارس .. فارس وليد .. أهو .. فتحت الصورة .. مش ممكن ياجماعة .. انا الحالات دي بتخليني في منتهى السعادة .. حاجة تفرح بجد .. لقيت صورة بيبي بتاع 6 شهور كده عنده حول انسي .. اللي احنا بنسميه الحول الانسي الخلقي .. أو الحول الانسي للاطفال الرضع

وزي ما قلت لكم قبل كده .. الحول ده هو اشهر انواع الحول عند البيبيهات .. يعني تقريباً نص البيبيهات إللي عندهم حول بنلاقي عندهم حول انسي خلقي ..

ودايماً بأقول للامهات لما البيبي يظهر عنده حول انسي – يعني عينه تخش لجوه باستمرار – في اول 6 شهور من عمره فأول احتمال تفكروا فيه هو الحول الانسي الخلقي

ودايماً باقولهم كل مانعمل العملية ونصلح الحول بدري كل ما كان احسن عشان العين الحولة ماتضعفش او تكسل والطفل يكمل حياته طبيعي ومركز الابصار ومركز الاتحاد اللي في المخ ينمو بصورة طبيعية .. والولاد دول اللي عملنا لهم عملية وهما بيبيهات بنشوفهم لما يكبروا .. أد فارس كده ونيجي نفحصهم نلاقيهم طبيعيين جداً .. كأنهم مكنش عندهم حول أصلاً .. 

وصدقوني نتايج العمليات عند الاطفال دول ممتازة .. زي عملية فارس كده ... عينيهم بتتعدل وما يحتاجوش عمليات تاني أبداً ويكملوا حياتهم زي أي طفل طبيعي

الحمد لله رب العالمين .. يستاهل الحمد والله

د. جمــال صبـــحي     

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders