اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي للأطفال الرضع 8



    
 

 

حالة هذا الأسبوع ( 47 ) : رودينا حبيب 7 شهور .. من قنا

" معقول يا دكتور نعملها عملية في السن دي ؟؟؟ "

طبعاً معقول يافندم .. ونعملها في سن أصغر من كده كمان .. مش أحسن لما نسيبها لما تكبر والحول ده في عينيها ونظر العين الحولة يضعف .. ونخش في مشكلة كسل العين .. ونقعد نعالج في الكسل والضعف شهور وسنين .. ويا عالم هيتعالج ولا مش هيتعالج

انا مش هابطل اتكلم ابداً عن الحول الانسي للاطفال الرضع .. لأنه اكتر نوع من انواع الحول باشوفه عند البيبيهات .. يعني تقريباً نص البيبيهات إللي عندهم حول بالاقيهم عندهم الحول ده ..

انا دايماً بأقول للامهات لما البيبي يظهر عنده حول انسي – يعني عينه تخش لجوه – في اول 6 شهور من عمره فأول احتمال تفكري فيه هو الحول ده ... ولازم تكشفي على ابنك فوراً .. اوعي تصدقي اللي يقولك كل العيال بيتولدوا كده وبعدين عينيهم بتتعدل لوحدها .. لأ طبعاً .. مش كل العيال كده .. ده كلام غلط .. بصي حواليكي يافندم هتلاقي مش كل العيال كده ولا حاجة .. بنتك بس هي اللي كده

الحول ده يا جماعة مالوش علاج إلا العملية .. كتير من الامهات بيقولوا لي مانستنى شوية لما البنت تكبر يمكن الحول يتعدل لوحده ... أو مانستنى شوية لما تكبر شوية عشان تستحمل العملية .. تكبر ايه يا جماعة وتستحمل ايه .. مامة رودينا قالت لي بالحرف الواحد " معقول يا دكتور جمال هتعملها عملية في السن دي .. دي لسه حتة لحمة .. شوف لنا أي حل تاني .. أي حل بس بلاش العملية "

يا جماعة الحول الانسي للاطفال الرضع مش بيتعدل لوحده أبداً .. مش بيتعدل الا بعملية .. مهما استنيتوا برضه هتعملوا العملية .. وكل مانعمل العملية بدري كل ما كان احسن .. عشان العين الحولة ماتضعفش او تكسل .. وعشان كمان مركز اتحاد العينين في المخ بيتكون في السن الصغيرة دي .. احنا بنعمل العمليات دي لبيبيهات عندهم 4 شهور من غير أي مشكلة .. يعني رودينا تعتبر كبيرة والله ..  وصدقوني انا دايماً بأقول نتايج العمليات عند البيبيهات دول ممتازة .. وعادة بيحتاجوا عملية واحدة عينيهم بتتعدل بعدها .. زي عملية رودينا كده .. عينها اتعدلت تماماً .. دي صورتها بعد العملية بساعتين .. بس هي بتعيط شوية عشان عينيها لسه حمرا وبتحرقها .. معلش يا حبيبتي .. يومين وهيعدوا على خير ان شاء الله ..

حمد الله على سلامتك يا رودي .. والف مبروك يا حبيبتي ...

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders