اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


فرط نشاط العضلة المائلة 1



    
 

 

حالة هذا الأسبوع ( 167 ) احمد .. 4 سنين .. من قنا

" فرط نشاط العضلة المائلة "

شاهد صورة احمد بعد العملية في اول تعليق

ساعات الحول الانسي عند الأطفال بيبقى معاه حول رأسي تاني غريب شوية .. الحول التاني ده مش بيبان إلا لما الطفل يبص للجنب .. يعني الطفل وهو باصص قدامه بيبان انه حول انسي عادي من اللي احنا عارفينه .. يعني العين بتكون حوله ناحية المناخير .. لكن لما ييجي يبص للجنب نلاقي عينه طلعت لفوق وبقى شكلها غريب جداً

طيب ايه سبب الحركة الغريبه دي ؟

سبب الحركه الغريبه دي هو فرط نشاط العضلة المائله .. احنا قلنا قبل كده ان كل عين بيحركها 6 عضلات .. 4 عضلات مستقيمه وعضلتين مائلتين .. ساعات عضله من العضلات المائله بتكون نشاطها أزيد من الطبيعي .. فلما الطفل يبص للجنب نلاقي العين طلعت لفوق .. فيحصل المنظر العجيب ده اللي انتم شايفينه في صورة احمد قبل العمليه

طيب السؤال هنا .. في حالة زي دي واحنا كده كده هنعمل عملية عشان نعدل الحول الأنسي يعني الولد بعد العملية وهو باصص قدام هيكون شكله طبيعي.. كفاية كده .. ولا نعمل برضه العضلة المائلة دي عشان بعد العملية يبقى شكله طبيعي برضه وهو باصص للجنب ؟

طبعاً لازم نعمل برضه العضلة اللي نشاطها زيادة .. ازاي يعني نسيب احمد كل أما يبص للجنب عينه تطلع لفوق ويبقى شكله عجيب بالمنظر ده .. طيب هو هيعيش إزاي كده ياجماعه .. يبطل يعني يبص يمين وشمال ولا يعمل ايه يعني .. لأ طبعاً لازم نعمل الاتنين مع بعض .. نعدل له الحول الأنسي ونعدل له برضه الحول الرأسي كمان

انا فهمت والد احمد الموضوع .. وأقنعته بأهمية العمليه وإزاي ان الولد لازم يكون شكله طبيعي وهو بيبص في أي اتجاه مش قدامه بس .. والعملية ناجحه ان شاء الله .. والمنظر الغريب ده مش هيظهر تاني أبداً بعد العمليه

المهم .. عملية احمد الحمد لله كانت ممتازة والنتيجه كانت هايله .. عينه بطلت تعمل كده خلاص وكمان الحول الانسي اتعدل

حمد الله على سلامتك يا ابني .. والف مبروك .. بص يمين وشمال زي مانت عايز .. خلاص مابقاش فيه مشكله يا حبيبي

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders