اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


فرط نشاط العضلة المائلة 2


حالة هذا الأسبوع ( 193 ) رؤى محمد  .. سنتين .. من حلوان

" فرط نشاط العضلة المائلة "

كتير من انواع الحول مش بتبان إلا لما العيان يبص للجنب .. العيان وهو باصص قدامه بيكون طبيعي خالص .. زي حالة رؤى كده .. رؤى وهي باصه قدامها شكلها بيكون عادي مفيش أي حاجه .. تيجي تبص للجنب نلاقي عينها طلعت لفوق واختفت .. وبقى شكلها غريب جداً

ايه سبب الحركه الغريبه دي ؟

سبب الحركة الغريبه دي هو نشاط زائد في العضلة المائله .. احنا قلنا قبل كده ان كل عين بيحركها 6 عضلات .. 4 عضلات مستقيمه وعضلتين مائلتين .. ساعات عضله من الاتنين دول بتكون قويه أزيد من الطبيعي .. فلما العيان يبص للجنب العضله دي بتشد العين لفوق .. فيحصل المنظر ده اللي انتم شايفينه في صورة رؤى قبل العمليه

طيب السؤال هنا .. في حاله زي دي نسيب البنت كده مادام وهي باصه قدامها كويسه ومفيش حاجه .. ولا نعملها عمليه

طبعاً لازم نعملها عمليه .. ازاي يعني نسيب بنت زي القمر كده كل أما تبص للجنب عينها تطلع لفوق ويبقى شكلها بالمنظر ده قدام الناس .. طيب هي تعيش إزاي كده .. تبطل يعني تبص يمين وشمال ولا تعمل ايه يعني .. لأ طبعاً لازم تعمل عمليه ..

انا فهمت مامة رؤى الموضوع .. وأقنعتها بأهمية العمليه وإزاي ان البنت لازم يكون شكلها طبيعي وهي بتبص في أي اتجاه مش قدامها بس .. والعمليه ناجحه ان شاء الله .. والمنظر الغريب ده مش هيظهر تاني أبداً بعد العمليه

المهم .. عمليه رؤى الحمد لله كانت ممتازه والنتيجه كانت هايله .. عينها بطلت تعمل كده خلاص

حمد الله على سلامتك يا رؤى .. والف مبروك يا حبيبتي

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders