اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي المتقطع 1


    
 

 

 

حالة هذا الأسبوع ( 39 ) : ر. س. 4 سنوات .. من كفر الشيخ

" الحول الوحشي المتقطع عند الأطفال "

الحول ده ياجماعة من أنواع الحول المشهورة جداً ومن الأنواع الغريبة برضه ..

حول وحشي زي مانتم عارفين يعني العين بتحدف لبرة ومتقطع يعني مش على طول .. يعني ساعات العين تبقى حادفة لبرة وباين قوي انها حولة وساعات ما يكونش فيه أي حول .. بعض الدكاترة بيسموه حول وحشي مؤقت .. برضه اسم صح .. يعني العين تحدف لبرة .. وتقعد كده شوية وقت .. وبعدين ترجع طبيعية تماماً.

مامة البنت الأمورة دي جت لي العيادة من شهرين كده

·     خير يامدام

·  بنتي يادكتور جمال عندها 4 سنين .. من سنة كده لاحظت ان ساعات عينيها بتحدف لبرة ... تقعد حولة كده ثواني وبعدين ترجع تتعدل تاني

·     امتى عينيها بتحدف يامدام ؟

·     ساعات لما تكون سرحانة ... وساعات لما تكون مركزة .. ساعات لما تكون صاحية من النوم .. وساعات في آخر اليوم لما تكون تعبانة وعايزة تنام  .. ساعات لما تكون عيانة وسخنة.. وساعات تحول من غير أي سبب.. بس عندها حاجة غريبة قوي لما بتكون ماشية في الشمس دايماً بتغمض عين وتفتح عين .. بنتي ما بتستحملش الشمس خالص يا دكتور .. حاجة تانية غريبة جداً .. دايماً لما تتصور بنتي بتطلع حولة في الصورة.

·     طيب تقدري تقولي يا فندم هي بتحول كام مرة في اليوم كده ؟

·     حوالي 20 مرة في اليوم.

·     بتعرف تعدلها بنفسها ولا العين بتتعدل لوحدها ؟

·  لا والله .. ساعات بتعرف تعدلها بنفسها .. لما أنبها وأزعق لها " اعدلي عينك " .. تقوم تعدلها .. وساعات اسيبها كده اشوفها هتقعد حولة أد ايه ألقاها تتعدل لوحدها.

طيب ياجماعة اشرح لكم بقى الموضوع

الحول المتقطع من أنواع الحول اللي متخوفش أبداً .. عمر العين نظرها مايضعف من الحول المتقطع لأن كل شوية العين بتتعدل وتبص طبيعي خالص عشان كده نظرها مش بيضعف أبداً زي مبيحصل في أنواع الحول التانية اللي العين فيها ما بتتعدلش أبداً .. وفي الحقيقة الكلام في الكتب بيقول حقايق مهمة جداً عن الحول المتقطع عايز كل الأمهات يعرفوها:

1.           الحول الوحشي المتقطع لايمكن نمنعه من الظهور إلا بعمل العملية.

2.           نسبة نجاح عملية الحول المتقطع رائعة وفعلاً بعد العملية الحول ما بيظهرش أبداً.

3.           النظارة والتمارين علاج مش مؤكد للحول المتقطع .. ساعات بتنفع في علاجه وساعات لأ.

4.           ساعات الحول المتقطع بيتحول لحول دائم والعين تحول وماتتعدلش أبداً .. لكن ده يا جماعة مش بيحصل مرة واحدة كده .. بيحصل بالتدريج .. تيجي الأم تقولي دلوقتي بقت بتحول ييجي 50 مرة في اليوم .. وبعد فترة تقولي دلوقتي بتحول ييجي 100 مرة في اليوم .. وكده يعني  

5.           كتير من الكتب بتقول مادام الحول بيظهر أوقات قليلة وبقية الوقت العين معدولة يبقى مفيش أي خوف على النظر وممكن منعملش العملية خالص .. يعني مثلاً الحالة بتاعتنا النهاردة .. يعني ايه 20 مرة في اليوم .. وايه يعني .. 20 مرة العين بتحول وتقعد حولة 5 ثواني يعني بتحول 3 دقايق كل 24 ساعة .. ده وقت قليل جداً ..  لايمكن يأثر على العين في أي حاجة

ده اللي في الكتب لكن الواقع حاجة تانية خالص

مافيش أم بتوافق أبداً انها تسيب بنتها تحول .. حتى لو 3 دقايق طول اليوم .. ودايماً اسمع تعليقات الأمهات:

" زمايلها في المدرسة ابتدوا ياخدوا بالهم "

" اصحابها بيضحكوا عليها لما بتحول .. البنت ابتدت تتأثر "

" الميس بتاعتها كل يوم تتصل بيا تقولي روحي اكشفي لبنتك "

" انا مرعوبة يا دكتور جمال تيجي يوم تحول وماتتعدلش تاني "

" انا عارفة فعلاً ان الحول ده مش هيأثر على عين بنتي .. لكن انا مش عايزاه يحصل أبداً .. انا عايزه اعمل لها العملية "

وتحت هذه الضغوط الرهيبة من الأمهات انا فعلاً باعمل عمليات كتيرة جداً لأطفال عندهم حول متقطع بيظهر أوقات قليلة رغم اني دايماً بأقول انه حول غير ضار على الاطلاق .. لكن اللي بيخليني مطمن  دايماً حاجتين .. أول حاجة ان عمليات الحول المتقطع دايماً بتنجح بإذن الله وتوفيقه وبعد العملية الحول ما بيظهرش أبداً .. الحاجة التانية انا عندي قناعة خاصة ان من حق الطفل انه يكبر في جو صحي وماحدش يضحك عليه ولا يبصله بصه مش هي ويحسسه انه مش طبيعي ونفسيته تتأثر في السن الحرجة دي.

المهم .. الحمد لله عملت العملية للقمر ر.س. وفعلاً الحول بطل يظهر خالص .. مامتها وباباها فرحانين قوي بالنتيجة دي وطلبوا مني اكتب اسمها بالأحرف الأولى .. آنسة بقى وكده ..

حمد الله على سلامتك يا حبيبتي  .. والف مبروك

د. جمــال صبـــحي

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders