اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي المتقطع 10


    
 

 

حالة هذا الأسبوع ( 158 ) رضوى ياسين .. 10 سنوات .. من قنا

" الحول الوحشي المتقطع "

البنت العسولة دي جت لي العيادة مع مامتها وباباها .. عندها الحول ده .. الحول ده مشهور جداً وبنشوفه كتير أوي .. انا كل يوم افتح صفحتي ألاقي كتير من الناس بعتوا نفس الرسالة  :

( انا ابني / بنتي يادكتور عندها حول بس مش على طول .. ساعات يبقى فيه حول وساعات مفيش .. عينيها تبقى طبيعية خالص وفجأة تحول لبره .. تقعد ثواني وبعدين ترجع طبيعية تاني .. اسمه ايه الحول ده .. وعلاجه ايه ؟ )

طيب ده ياجماعه اسمه الحول الوحشي المتقطع ( متقطع يعني حول مش دائم .. ساعات يبقى فيه حول وساعات مفيش )

 أنا النهارده هأجاوب كل الاسئله اللي بيسألها الناس عن الحول الوحشي المتقطع

·     ايه سبب الحول الوحشي المتقطع .. وليه ساعات العين تكون معدوله وساعات تكون حوله ؟

ج : طيب .. ببساطه .. سبب الحول ده ان العضله اللي بتشد العين لبره بتكون اقوى من العضله اللي بتشد العين لجوه .. فكل شويه العين تحول لبره .. المخ بياخد باله ان فيه حاجه غلط وان العين حدفت لبره .. فيشد العين لجوه تاني عشان تتعدل .. ساعات العين تتعدل لوحدها وساعات الواحد بيعرف يعدلها بنفسه.

·     طيب فيه حاجات معينة تخلي العين تحول ؟

ج: فعلاً .. معظم العيانين بيقولوا ان فيه حاجات معينه تخلي الحول يظهر .. منها السرحان .. التركيز الشديد .. فلاش الكاميرا .. الخروج في الشمس .. الصحيان من النوم .. الاجهاد والتعب والمرض .. يعني حاجات كتير .. وساعات الحول بيظهر لوحده من غير اي سبب 

·     بنتي عندها سنه ونص وعندها حول وحشي متقطع .. ممكن لما تكبر شويه الحول ده يخف لوحده ؟

ج:  للأسف مش ممكن .. الحول الوحشي المتقطع مش بيخف لوحده أبداً .. هيفضل كده على طول

·     طيب هو ممكن يزيد مع الوقت ؟

ج: ممكن يزيد وومكن لأ .. بس برضه مش هيروح مع الوقت

·     هو الحول الوحشي المتقطع زي الحول الدائم ممكن يضعف العين ويعمل كسل ؟

ج: العين نظرها مش بيضعف أبداً من الحول المتقطع لأن كل شويه العين بتتعدل وتبص طبيعي خالص عشان كده نظرها مش بيضعف .. أنواع الحول التانيه اللي العين فيها ما بتتعدلش هي اللي بتضعف النظر وبيحصل فيها كسل

·     هو الحول ده فعلاً علاجه عمليه .. مفيش حل تاني ؟

ج: صحيح .. الحول الوحشي المتقطع لايمكن نمنعه من الظهور إلا بعمل عمليه .. النظاره والتمارين علاج مش مؤكد للحول المتقطع .. الحل الأكيد هو العمليه

·     طيب ليه نعمل عمليه مادام الحول ده مش بيضعف  النظر ؟

ج: عشان الشكل .. صحيح انا بأقول دايماً ان الحول المتقطع ده ملوش أي ضرر على العين الا ان مفيش أم بتوافق أبداً انها تسيب ابنها او بنتها تحول بالمنظر ده .. ومفيش برضه شاب او شابه يقبل ان عينه تحول بالمنظر ده وهو قاعد ولا قاعده مع اصحابهم وزمايلهم ..  ودايماً يطلبوا مني انهم يعملوا عمليه عشان الحول المؤقت ده ما يظهرش عندهم تاني

·     طيب ايه انسب سن لعمل العمليه ؟

ج: عادة الأطفال دول بييجوا لي في سن 3 سنين أو أكتر شوية .. على دخول المدارس كده لما يبدأوا يخرجوا ويشوفوا الناس والناس تشوفهم بييجي الأب والأم يدوروا على حل للمشكلة

·     طيب رأيك انت ايه يا دكتور .. نعمل العمليه امتى ؟

ج: في الحقيقه ميعاد العمليه في الحول الوحشي المتقطع مش الدكتور هو اللي بيحدده .. العيان هو اللي بيحدد ميعاد العمليه .. لو الحول بيظهر قدام الناس وعامل للعيان حرج وكده .. يبقى يطلب عمل العمليه .. احنا قلنا الحول ده ملهوش ضرر .. العمليه بتتعمل عشان الشكل .. عشان الحول ميظهرش .. لو الأم شايفه ان الحول هيأثر على نفسية ابنها او بنتها يبقى تعمل العمليه .. لو ولد أو بنت الحول بيظهر عندهم في الفصل أو الجامعه او الشغل قدام اصحابهم وزمايلهم .. طبعاً يعملوا العمليه .. يعيشوا في الحرج والكسوف ده ليه مادام الموضوع له حل .. وحل مضمون .. ليه يقبلوا يعيشوا كده 

·     العمليه بتبقى في عين واحده ولا الاتنين ؟

ج: عادةً بتكون في الاتنين

·     طيب نسبة نجاح العملية كام في الميه ؟

ج: نسبة نجاح عملية الحول الوحشي المتقطع تقريباً 100% وفعلاً بعد العمليه الحول مش بيظهر أبداً

·     طيب ممكن يحصل مضاعفات من العمليه ؟

ج: آه .. فيه حاجتين ممكن يحصلوا عند عدد قليل جداً من المرضى أول حاجه انه يظهر عندهم بعد العمليه حول انسي بسيط جداً وده بيروح لوحده خلال شهرين من العمليه .. تاني حاجه ممكن تحصل ان العيان ممكن يشوف ازدواج في الرؤيه بعد العملية وبرضه ده بيروح لوحده بعد يومين تلاته من العمليه

مامة رضوى سألتني كل الاسئلة دي وقررت تعمل العملية لبنتها .. عندها حق طبعاً .. رضوى لما الحول بيظهر عندها بيغير شكلها خالص وده بيضايقها جداً قدام زميلاتها وأصحابها

تاني يوم الصبح عملت العملية لرضوى .. دي صورتها نفس يوم العملية بليل قبل ماتسافر .. طبعاً عينها حمرا أوي .. ده طبيعي خالص أول يوم .. مع القطرة والمية الدافية الاحمرار ده بيروح خالص في خلال اسبوعين تلاتة بالكتير

الف حمد الله على سلامتك يا بنتي والف مبروك

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders