اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي المتقطع 15


    
 

حالة هذا الأسبوع ( 201 ) ملك عادل .. 8 سنين .. من بورسعيد

" الحول الوحشي المتقطع "

الحول ده من أشهر أنواع الحول عند الأطفال .. كل يوم أفتح رسايل الصفحة ألاقي نفس الرسالة باعتها كتير من الأمهات :

(من فضلك يا دكتور جمال أنا بنتي تبقى قاعدة طبيعية خالص وبعدين فجأة عينها تحول لبره ويبقى شكلها غريب أوي .. تقعد كده ثواني وبعدين تتعدل .. اسمه ايه الحول ده وعلاجه ايه ؟ )  

ده اسمه الحول الوحشي المتقطع .. وزي ماقلتلكم قبل كده بنسميه وحشي يعني العين بتحول لبره وبنسميه متقطع عشان العين مش حوله كده على طول .. يعني ساعات تبقى حادفة لبره وساعات ما يكونش فيه حول خالص .. ساعات بنسميه برضه حول مؤقت .. يعني مش موجود طول الوقت

دي أهم الاسئلة اللي العيانين بتسألها عن الحول ده ..لو عندكم سؤال عن الحول المتقطع أكيد هتلاقوه مكتوب هنا

 

" هو الحول المتقطع ممكن يضعف العين ويعمل كسل ؟ "

العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي خالص عشان كده نظرها مش بيضعف .. ده غير الحول الدائم اللي العين فيها ما بتتعدلش أبداً

 

" هو الحول المتقطع فعلاً علاجه عملية .. مفيش حل تاني ؟ "

فعلاً .. الحول الوحشي المتقطع علاجه الوحيد هو العملية

 

" طيب ليه نعمل عملية مادام الحول ده مش بيضعف  النظر ؟ "

رغم اني فعلاً بأقول الكلام ده لكل الامهات وان الحول المؤقت ده ملوش أي ضرر على النظر .. الا ان مافيش أم بتوافق أبداً انها تسيب ابنها او بنتها تحول بالمنظر ده ودايماً يطلبوا مني انهم يعملوا عملية عشان الحول المؤقت ده ما يظهرش عندهم تاني .. وانا فعلاً باعمل عمليات كتيرة جداً لأطفال عندهم حول متقطع رغم اني دايماً بأقول انه حول غير ضار على الاطلاق ..

 

" طيب نسبة نجاح العملية كام في المية ؟ "

نسبة نجاح عملية الحول المتقطع تقريباً 100% وفعلاً بعد العملية الحول ما بيظهرش أبداً.

 

" طيب ممكن يحصل مضاعفات من العملية ؟ "

حاجتين ممكن يحصلوا.. فيه عدد قليل جداً من العيانين بيظهر عندهم بعد العملية حول انسي بسيط جداً بيروح لوحده من غير أي تدخل جراحي .. وفيه عدد قليل تاني ممكن يشوف ازدواج في الرؤية بعد العملية وبرضه بيروح لوحده بعد شوية

مامة ملك ست بورسعيدية زي العسل .. جابت لي بنتها وقالت لي انا عارفه كل حاجه يا دكتور جمال حضرتك كتبتها عن الحول المتقطع .. انا عايزه اعمل العملية لبنتي .. مش عايزة الحول ده يظهر أبداً .. انت عارف بقى بنت وكده ..

المهم .. عملت العملية لملك .. الحمد لله البنت بعد العملية بقت زي القمر .. حاجه تانيه خالص

حمد الله على سلامتك يا بنتي  .. عمليتك نتيجتها ممتازة ..  والف مبروك

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders