اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي المتقطع 2


    
 

 

 

حالة هذا الأسبوع ( 42 ) : هنا علاء  .. 4 سنوات .. من الفيوم

" انا جوه الدنيا "

هقول لكم ايه موضوع بره الدنيا ده بس لما نتكلم عن الحالة الاول

حالتنا النهاردة برضه حول وحشي متقطع .. زي ما قلنا قبل كده .. الحول ده ياجماعة من أشهر انواع الحول عند الاطفال .. مفيش يوم بيعدي الا لما اشوف فيه طفل عنده حول وحشي متقطع .. مفيش يوم عمليات بيعدي الا لما بيبقى فيه طفل بيعمل عملية حول وحشي متقطع

نقول كمان.. اكيد كلكم حفظتوها خلاص .. حول وحشي يعني العين بتحدف لبرة ومتقطع يعني مش على طول .. يعني ساعات العين تبقى حادفة لبرة وباين قوي انها حولة وساعات ما يكونش فيه أي حول

من شهر تقريباً دخل عليا العيادة أم شابة من الفيوم .. مدياها شوية كآبة كده .. ومعاها بنت صغيرة زي القمر .. تقاطيعها حلوة جداً .. بس ياخسارة .. البنت عندها حول وحشي جامد قوي .. مخبي وشها الجميل

·     خير يامدام

·     انا مامة " هنا " يا دكتور جمال اللي بعت لك حالتها على الفيس

فتحت الصفحة بتاعتي عشان اراجع الرسائل

·     اسمك ايه على الفيس يافندم

·     " انا بره الدنيا "

·     افندم ؟؟؟ اسمك " انا بره الدنيا "

انا في الحقيقة يا جماعة مش بأركز قوي وانا باجاوب على رسايل الصفحة الكتيرة في اسماء الناس .. بافتح الرسالة .. اقرأ الموضوع على طول واجاوب الناس عن استفسارتهم على حالات الحول اللي عندهم .. الموضوع بياخد مني وقت طويل يومياً .. حوالي ساعة ونص كل يوم بجاوب الرسايل بتاعة الصفحة اللي بقت كتيرة قوي .. عشان كده مش بأركز خالص في اسامي الناس.

قعدت أرول في اسامي الناس اللي باعته الرسايل عندي لحد اما لقيت فعلاً اسم " انا بره الدنيا " .. اسم غريب قوي !!! .. المهم فتحت الرسالة لقيت فيها صورة " هنا " اللي انا عاملها كروب ومنزلها على الصفحة دلوقتي قبل العملية .. بنت رائعة فعلاً .. حاطة فيونكات حمرا في شعرها .. لون الفستان احمر برضه .. طقم يعني وكده .. بس البنت تحس في الصورة انها حزينة .. مكتئبة .. مش عارف اوصفها .. من الآخر كده حاسس من الصورة ان البنت مش مبسوطة

وبعدين قعدت اقرا الكلام اللي تحت الصورة اللي مامتها " انا بره الدنيا " كاتباه 

( بنتي هنا عندها 4 سنين .. لاحظت من فترة ان عينيها بتحدف لبرة ... تقعد حولة كده شوية وبعدين تتعدل تاني لوحدها .. لاحظت انها بتعمل كده لما تكون سرحانة ... وساعات برضه لما تكون مركزة .. وساعات لما تكون صاحية من النوم .. انا عارفة من الصفحة بتاعتك ان ده اسمه حول وحشي متقطع وان الحول ده مش هيأثر على عين بنتي .. ومش هيضعفها .. لكن انا مش عايزاه يحصل أبداً .. انا عايزه اعمل لها العملية .. مش عايزة اشوفها بتحول خالص .. اصحابها في المدرسة اخدوا بالهم منها لما بتحول .. البنت ابتدت تتأثر .. لازم نحل الموضوع ده .. ارجوك يا دكتور جمال ).

طيب ياجماعة نأكد لعاشر مرة على مجموعة اساسيات لازم كلنا نحفظها صم :

1.           الحول الوحشي المتقطع لايمكن نمنعه من الظهور إلا بعمل العملية.

2.           نسبة نجاح عملية الحول المتقطع رائعة وفعلاً بعد العملية الحول ما بيظهرش أبداً.

3.           النظارة والتمارين علاج مش مؤكد للحول المتقطع .. ساعات بتنفع في علاجه وساعات لأ.

4.           ساعات الحول المتقطع بيتحول لحول دائم والعين تحول وماتتعدلش أبداً

5.           القواعد الطبية بتقول مادام الحول بيظهر أوقات قليلة منعملش العملية الا لما فترات الحول تزيد قوي .. ده اللي في الكتب لكن الواقع حاجة تانية خالص .. مافيش أم بتوافق أبداً انها تسيب بنتها تحول .. حتى لو 3 دقايق طول اليوم .. ودايماً اسمع تعليقات من الأمهات زي بالظبط اللي كاتباه مدام " انا بره الدنيا " في رسالتها

وزي ما قلت لكم قبل كده انا عندي قناعة خاصة ان من حق أي طفل انه يكبر في جو صحي وماحدش يضحك عليه ولا يبصله بصه مش هي ويحسسه انه مش طبيعي ونفسيته تتأثر في السن الحرجة دي.

المهم .. عملت العملية لهنا من اسبوعين كده .. النهاردة فتحت الرسايل لقيت مامتها " انا بره الدنيا " بعتت لي صورتها الجديدة بعد العملية .. فيونكات موف .. وفستان برضه موف .. طقم جديد بقى ماشي مع النيولوك .. لأ .. بصراحة ياجماعة قمر وشياكة كمان  ومكتوب تحت الصورة :

( فعلاً الحول بطل يظهر خالص .. الحمد لله.. هنا لما عينها اتعدلت شكلها احلو قوي .. بقت حاجة تانية خالص ... تسلم ايديك يا دكتور جمال .. انا حاسة دلوقتي ان انا بقيت جوه الدنيا خلاص .. ربنا يخليك لينا )

الف حمد الله على سلامتها يا فندم  .. وربنا يخليكي ليها

د. جمــال صبـــحي

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders