اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي المتقطع 5


    
 

 

حالة هذا الأسبوع ( 82 ) رحاب عبد النعيم 4 سنين .. من قنا

" الحول الوحشي المتقطع "

الحول ده يا جماعة من أشهر أنواع الحول عند الأطفال .. وزي ماقلتلكم قبل كده بنسميه متقطع عشان العين مش حوله كده على طول .. يعني ساعات تبقى حادفة لبره وساعات ما يكونش فيه حول خالص .. ساعات بنسميه برضه حول مؤقت .. يعني مش موجود طول الوقت

المهم .. دي أهم الاسئلة اللي بيسألها العيانين اللي عندهم الحول ده ..لو عندكم سؤال عن الحول المتقطع أكيد هتلاقوه مكتوب هنا

 

" هو الحول المتقطع ممكن يضعف العين ويعمل كسل ؟ "

العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي خالص عشان كده نظرها مش بيضعف زي مابيحصل في أنواع الحول التانية اللي العين فيها ما بتتعدلش ..

 

" هو الحول ده فعلاً علاجه عملية .. مفيش حل تاني ؟ "

فعلاً .. الحول الوحشي المتقطع لايمكن نمنعه من الظهور إلا بعمل عملية .. النظارة والتمارين علاج مش مؤكد للحول المتقطع .. ساعات بتنفع وساعات لأ.

 

" طيب ليه نعمل عملية مادام الحول ده مش بيضعف  النظر ؟ "

رغم اني فعلاً بأقول الكلام ده لكل الامهات وان الحول المؤقت ده ملوش أي ضرر الا ان مافيش أم بتوافق أبداً انها تسيب ابنها او بنتها تحول بالمنظر ده ودايماً يطلبوا مني انهم يعملوا عملية عشان الحول المؤقت ده ما يظهرش عندهم تاني .. وانا فعلاً باعمل عمليات كتيرة جداً لأطفال عندهم حول متقطع رغم اني دايماً بأقول انه حول غير ضار على الاطلاق ..

 

" طيب نسبة نجاح العملية كام في المية ؟ "

نسبة نجاح عملية الحول المتقطع تقريباً 100% وفعلاً بعد العملية الحول ما بيظهرش أبداً.

 

" طيب ممكن يحصل مضاعفات من العملية ؟ "

حاجتين ممكن يحصلوا.. فيه عدد قليل من العيانين بيظهر عندهم حول انسي بسيط جداً بيروح خلال شهرين من العملية .. وفيه عدد قليل تاني ممكن يشوف ازدواج في الرؤية بعد العملية وبرضه بيروح بعد شوية

مامة رحاب ست صعيدية زي العسل من قنا .. جابت لي بنتها وقالت لي انا عارفة كل حاجة يا دكتور جمال حضرتك كتبتها عن الحول ده .. بس انا عايزة اعمل العملية لبنتي .. مش عايزة الحول ده يظهر أبداً .. انت عارف بقى بنت وكده ..

وفعلاً عملت العملية لرحاب تاني يوم .. والنهاردة جت لي العيادة تاني اطمن عليها قبل ما ترجع قنا .. حمد الله على سلامتك يا بنتي  .. عمليتك نتيجتها ممتازة ..  والف مبروك

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders