اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي المتقطع 6


    
 

 

حالة هذا الأسبوع ( 96 ) : احمد اسامة ..  4 سنوات .. من المعادي

" الحول الوحشي المتقطع "

مامة الولد العسول دي جت لي العياده من شهرين كده

·     خير يامدام

·  احمد يادكتور جمال من سنة كده لاحظت ان ساعات عينيه بتحدف لبره ... تفضل كده ثواني وبعدين ترجع تتعدل

·     امتى عينيه بتحدف يامدام ؟

·  ساعات لما يكون سرحان ... وساعات لما يكون مركز .. ساعات لما يكون صاحي من النوم .. وساعات في آخر اليوم لما يكون تعبان وعايز ينام  .. ساعات لما يكون عيان وسخن.. وساعات يحول من غير أي سبب .. ساعات بيعرف يعدلها بنفسه .. وساعات لما أقول له " اعدل عينك " ..يعدلها .. وساعات تتعدل لوحدها.

طيب اشرح لكم الموضوع

" الحول الوحشي المتقطع "

حول وحشي زي مانتم عارفين يعني العين بتحدف لبره ومتقطع يعني مش على طول .. يعني ساعات العين تبقى حادفة لبره وباين قوي انها حوله وساعات ما يكونش فيه أي حول .. بعض الدكاترة بيسموه حول وحشي مؤقت .. برضه اسم صح .. يعني العين تحدف لبره .. وتقعد كده شوية وقت .. وبعدين ترجع طبيعية تماماً.

الحول الوحشي المتقطع ما يخوفش أبداً .. عمر العين نظرها مايضعف من الحول المتقطع لأن كل شوية العين بتتعدل وتبص طبيعي ..  عشان كده نظرها مش بيضعف أبداً

الكتب بتقول حاجات مهمة جداً عن الحول ده عايز كل الأمهات يعرفوها:

1.           الحول الوحشي المتقطع علاجه العملية .. مش بيتعالج أبداً بالنضارة

2.           نسبة نجاح عملية الحول المتقطع رائعة وفعلاً بعد العملية الحول ما بيظهرش أبداً.

3.           الكتب بتقول مادام الحول بيظهر أوقات قليلة يبقى مفيش أي خوف على النظر وممكن منعملش العملية خالص .. ده اللي في الكتب لكن الواقع حاجة تانية خالص

مافيش أم بتوافق أبداً انها تسيب ابنها أو بنتها تحول كده .. حتى لو 3 دقايق طول اليوم .. ودايماً اسمع تعليقات الأمهات:

" زمايله في المدرسة ابتدوا ياخدوا بالهم "

" اصحابه بيضحكوا عليه لما بيحول "

" الميس بتاعته كل يوم تتصل بيا "

وتحت هذه الضغوط من الأمهات انا فعلاً باعمل عمليات كتيرة لأطفال عندهم حول متقطع بيظهر أوقات قليلة رغم اني دايماً بأقول انه حول غير ضار على الاطلاق .. لكن اللي بيخليني مطمن  دايماً حاجتين .. أول حاجة ان نسبة نجاح عملية الحول المتقطع عالية جداً .. والحاجة التانية انا عندي قناعة ان من حق الطفل انه يكبر في جو صحي ومحدش يضحك عليه ولا يبصله بصه مش هي ويحسسه انه مش طبيعي ونفسيته تتأثر في السن الحرجة دي.

المهم .. الحمد لله عملت العملية لأحمد من شهر كده .. والحمد لله الحول بطل يظهر خالص ..

حمد الله على سلامتك يا حبيبي  ..

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders