اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي المتقطع 7


    
 

حالة هذا الأسبوع ( 123 )

" الحول الوحشي المتقطع "

الحول ده من أشهر أنواع الحول ..  بنسميه متقطع عشان العين مش بتبقى حوله على طول .. يعني ساعات تبقى حوله وساعات لأ .. زي مانتم شايفين في الفيديو .. ساعات العيان يبقى شكله طبيعي خالص وساعات عينه تحول لبره .. ساعات عينه اليمين وساعات عينه الشمال .. وساعات عين واحده بس هي اللي تحول وبعدين تتعدل تاني  .. عشان كده بنسميه حول متقطع .. يعني الحول مش موجود على طول .. فيه دكاتره بيسموه حول مؤقت .. عشان مش موجود طول الوقت

كل يوم ياجماعه افتح الرسايل بتاعة الصفحه ألاقي اسئله كتير جداً من الناس اللي عندهم حول وحشي متقطع

المهم .. انا جمعت في البوست ده كل الاسئله اللي بيسألها العيانين اللي عندهم حول وحشي متقطع .. لو عندكم سؤال عن الحول المتقطع أكيد هتلاقوه مكتوب هنا

س: ايه سبب الحول الوحشي المتقطع يا دكتور جمال .. وليه ساعات العين تكون معدوله شويه وساعات تكون حوله شويه ؟

ج : طيب .. نشرحه ببساطه .. سبب الحول ده ان العضله اللي بتشد العين لبره بتكون اقوى شويه من العضله اللي بتشد العين لجوه .. فكل شويه العين تحول لبره .. المخ بياخد باله ان فيه حاجه غلط وان العين حدفت لبره .. فيشد العين لجوه تاني عشان تتعدل

س: طيب فيه حاجات تخلي العين تحول وحاجات تخلي العين تتعدل ؟

ج: فعلاً .. معظم العيانين بيقولوا ان فيه حاجات معينه تخلي الحول يظهر .. منها السرحان .. التركيز الشديد .. فلاش الكاميرا .. الخروج في الشمس .. الصحيان من النوم .. الاجهاد والتعب والمرض .. يعني حاجات كتير .. وساعات الحول يظهر برضه من غير اي سبب 

س: بنتي عندها سنه ونص وعندها حول وحشي متقطع .. ممكن لما تكبر شويه الحول ده يخف لوحده ؟

ج:  للأسف مش ممكن .. الحول الوحشي المتقطع مش بيخف لوحده أبداً .. هيفضل كده على طول

س:  طيب هو ممكن يزيد مع الوقت ؟

ج: ممكن يزيد وومكن لأ .. بس برضه مش هيروح مع الوقت

س: هو الحول الوحشي المتقطع ممكن يضعف العين ويعمل كسل ؟

ج: العين نظرها مش بيضعف أبداً من الحول المتقطع لأن كل شويه العين بتتعدل وتبص طبيعي خالص عشان كده نظرها مش بيضعف زي مابيحصل في أنواع الحول التانيه اللي العين فيها ما بتتعدلش ..

س: هو الحول ده فعلاً علاجه عمليه .. مفيش حل تاني ؟ ج: الحول الوحشي المتقطع لايمكن نمنعه من الظهور إلا بعمل عمليه .. النظاره والتمارين علاج مش مؤكد للحول المتقطع .. ساعات بتنفع وساعات لأ .. الحل الأكيد هو العمليه

س: طيب ليه نعمل عمليه مادام الحول ده مش بيضعف  النظر ؟

ج: عشان الشكل .. صحيح انا بأقول دايماً ان الحول المتقطع ده ملوش أي ضرر على العين الا ان مفيش أم بتوافق أبداً انها تسيب ابنها او بنتها تحول بالمنظر ده .. ومفيش برضه شاب او شابه يقبل ان عينه تحول بالمنظر ده وهو قاعد ولا قاعده مع اصحابهم وزمايلهم ..  ودايماً يطلبوا مني انهم يعملوا عمليه عشان الحول المؤقت ده ما يظهرش عندهم تاني

س: طيب ايه انسب سن لعمل العمليه ؟

ج: ممكن العمليه تتعمل في أي سن .. لكن عادة الأطفال دول بييجوا لينا في سن سنتين .. سنتين ونص تقريباً

س: طيب رأيك انت ايه يا دكتور جمال .. نعمل العمليه امتى ؟

ج: في الحقيقه ميعاد العمليه في الحول الوحشي المتقطع مش الدكتور هو اللي بيحدده .. العيان هو اللي بيحدد ميعاد العمليه .. لو الحول بيظهر قدام الناس وعامل للعيان حرج وكده .. يبقى يطلب عمل العمليه .. احنا قلنا الحول ده ملهوش ضرر .. العمليه بتتعمل عشان الشكل .. عشان الحول ميظهرش .. لو الأم شايفه ان الحول هيأثر على نفسية ابنها او بنتها يبقى تعمل العمليه .. لو شاب أو شابة الحول بيظهر عندهم في الفصل أو الجامعه او الشغل قدام اصحابهم وزمايلهم .. طبعاً يعملوا العمليه .. يعيشوا في الحرج والكسوف ده ليه مادام الموضوع له حل .. وحل مضمون .. ليه يقبلوا يعيشوا كده 

س: العمليه بتبقى في عين واحده ولا الاتنين ؟

ج: عادةً بتكون في الاتنين

س: طيب نسبة نجاح العملية كام في الميه ؟

ج: نسبة نجاح عملية الحول الوحشي المتقطع تقريباً 100% وفعلاً بعد العمليه الحول مش بيظهر أبداً

س: طيب ممكن يحصل مضاعفات من العمليه ؟

ج: حاجتين ممكن يحصلوا عند عدد قليل جداً من المرضى أول حاجه انه يظهر عندهم بعد العمليه حول انسي بسيط جداً وده بيروح لوحده خلال شهرين من العمليه .. تاني حاجه ممكن تحصل ان العيان ممكن يشوف ازدواج في الرؤيه بعد العملية وبرضه ده بيروح لوحده بعد يومين تلاته من العمليه

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders