اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي المرتجع 2



    

 

حالة هذا الأسبوع ( 74 ) ابراهيم احمد 24 سنة ..  من المنوفية

" الحول الانسي المرتجع "

فرصة قبل ما اتكلم عن حالة ابراهيم اللي عمل عملية حول من حوالي 10 سنين والحول رجع له تاني - فرصة اني اقول لكم أكتر سؤال  العيانين بيسألوه سواء في العيادة أو على الفيس او بالايميل :

س 1 : رحت لدكاترة كتير وكلهم قالوا لي " اوعى تعملي العملية .. الحول هيرجع تاني .. صح الكلام ده يا دكتور جمال ؟ "

- س 2 : هو صحيح يا دكتور مادام العين ضعيفة يبقى لازم الحول يرجع بعد العملية ؟

- س 3 : طيب لو عملت العملية .. الحول هيرجع بعد كام سنة ؟

- س 4 : واحدة صاحبتي عملت العملية دي مرتين قبل كده .. هو صحيح كل أما تعملها الحول هيرد تاني ؟

- س 5 : انا عملت العملية قبل كده والحول رجع .. انا خايف جدا اعملها أحسن يرجع تاني .. مفيش حاجة نقدر نعملها عشان الحول مايرجعش ؟

- س6 : انا عملت الحول مرتين قبل كده ورجع .. ينفع اعمله تاني ؟

أولاً عايز اقول لكم الأول الكلام اللي يطمن .. مش كل انواع الحول ممكن الحول بيرجع فيها تاني بعد مانعدله بعملية .. فيه انواع حول نسبة رجوع الحول فيها صفر % .. يعني العيان يعمل العملية وعينه تتعدل ومش ممكن الحول يرجعله تاني ابدا

طيب انواع الحول التانية نسبة رجوع الحول فيها كام في المية ؟

نسبة رجوع الحول مش نسبة عالية زي ما الناس فاكرة .. دي بتتراوح بين 5 % الى 15 %  فقط حسب نوع الحول .. يعني كل 100 عيان يعملوا العملية حوالي 90 منهم يعملوا العملية ويكملوا حياتهم زي الفل والحول مايرجعش لهم ابدا طول عمرهم

طيب العشرة في المية التانيين اللي الحول رجع لهم تاني .. ياترى رجع لهم بعد كام سنة ؟

 فيه عيانين ممكن يرجع لهم الحول بعد العملية بسنتين كده وفيه اللي بيرجع لهم الحول  بعد  العملية بعشر سنين .. يعني ممكن اللي عنده حول مرتجع يكون عمل العملية وعاش 10 سنين زي الفل وبعدين الحول رجع له تاني .. زي ابراهيم الحالة بتاعة النهاردة ..  قعد 10 سنين كويس وبعدين الحول رجع له تاني زي مانتم شايفينه في الصورة

- طيب لو الحول رجع بنعمل ايه ؟ .. والله الاجابة بسيطة جداً .. وبأقولها لكل العيانين .. وده اللي انا قلته لابراهيم :

" فين المشكلة يابني .. ماتعمل عملية تاني والحول هيتعدل  "

" بس انا خايف اعملها ويرجع تاني "

" على أسوأ الفروض يا سيدي .. هيرجع بعد 10 سنين كمان .. طيب انت عايز تقعد أحول كده طول عمرك عشان خايف ان الحول يمكن .. ويجوز .. وربما .. وعسى .. ولعل يرجع تاني بعد 10 سنين .. ايه التفكير الغريب ده .. ما يرجع تاني .. وايه يعني .. ماهو لو رجع تاني يا ابراهيم - على اسوأ الفروض - هنعدله تاني .. فين المشكلة .. انا مش شايف أي مشكلة "

ابراهيم بعد كلامي ده اتشجع جداً .. وعملت له العملية تاني يوم  .. انا اتعمدت اشيل الغطا واصوره بعد العملية على طول عشان تعرفوا برضه ازاي العين بتكون حمرا قوي في عمليات الحول المرتجع .. الاحمرار ده مع انه بيقلق عيانين كتير لكن هو ملوش أي أهمية .. في الآخر الاحمرار ده هيختفي طبعاً .. ساعات بيروح بعد اسبوعين تلاتة .. وساعات بيقعد اكتر من كده .. بس برضه مش مهم .. في الآخر بيروح

الحمد لله .. ابراهيم عمليته حلوة قوي .. يارب تفضل كده على طول والحول ما يرجعش تاني

حمد الله على السلامة يا ابني .. والف ميروك

د جمــال صبحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders