اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي المرتجع 3


    

 

حالة هذا الأسبوع ( 83 ) عبد الكريم .. 23 سنة ..  مدرس من السودان

" دكتور جمال : أنا عملت عملية حول وأنا عمري 9 سنين والحول رجع لي ... ينفع أعمل عملية تاني ؟؟ "

السؤال ده بيجيلي كتير قوي في رسايل الصفحة

مش عارف ليه الناس فاكرة إن اللي عمل عملية حول والحول رجع له تاني .. يبقى خلاص مفيش فايدة .. مينفعش يعمل عملية تاني .. يرضى بنصيبه ويعيش كده

طبعاً غلط .. أكبر غلط .. مفيش أصلاً حاجة اسمها مينفعش نعمل عملية .. مهما كان السبب .. أي حول ياجماعة ممكن يتعدل بالعملية .. سواء عملت عمليات قبل كده .. سواء معملتش .. سواء أي حاجة .. أي حول في الدنيا بيتعدل بالعملية  

عبد الكريم .. الشاب الأسمر الجميل المؤدب ده جالي النهاردة من السودان

الحوار ده دار بيننا وفيه معلومات مهمة عايز الناس كلها تقرأها

- أنا عندي 23 سنة يا دكتور جمال .. عملت عملية حول وأنا صغير والحول رجع تاني

 ... ينفع أعمل عملية تاني ؟؟

- طبعاً ينفع يا عبد الكريم .. انت مش بتشوف حالات الحول المرتجع اللي على صفحتي ؟

- طبعاً بأشوفها .. وده اللي شجعني أجيلك .. بس أنا رحت لدكاترة كتير وقالوا لي " اوعى تعمل عملية .. مادام عملتها قبل كده .. يبقى الحول لازم هيرجع تاني .. صح الكلام ده يا دكتور جمال ؟ "

 

لأ طبعاً .. مش صح

طيب أنا عايز الأول اقول لكم شوية أرقام كده ..

مش كل انواع الحول ممكن الحول بيرجع فيها تاني بعد العملية .. فيه انواع حول نسبة رجوع الحول فيها صفر % .. يعني العيان يعمل العملية وعينه تتعدل ومش ممكن الحول يرجعله تاني ابدا

طيب انواع الحول التانية نسبة رجوع الحول فيها كام في المية ؟

نسبة رجوع الحول مش نسبة عالية زي ما الناس فاكرة .. دي بتتراوح بين 5 % الى 15 %  في أسوأ الأحوال .. يعني كل 100 عيان يعملوا العملية حوالي 90 منهم يعملوا العملية ويكملوا حياتهم زي الفل والحول مايرجعش لهم ابدا طول عمرهم

طيب العشرة في المية التانيين اللي الحول رجع لهم تاني .. ياترى رجع لهم بعد كام سنة ؟

 فيه عيانين ممكن يرجع لهم الحول بعد العملية بسنتين كده وفيه اللي بيرجع لهم الحول  بعد  العملية بعشر سنين أو أكتر .. زي عبد الكريم الحالة بتاعة النهاردة ..  قعد حوالي 15 سنة كويس وبعدين الحول رجع له تاني زي مانتم شايفينه في الصورة

" بس انا خايف اعملها ويرجع تاني "

" على أسوأ الفروض يا عبد الكريم .. الحول هيرجع بعد 15 سنة كمان .. طيب يا راجل عايز تقعد أحول كده طول عمرك عشان خايف ان الحول يمكن يرجع تاني بعد 15 سنة .. منطق غريب جداً والله "

عبد الكريم بعد كلامي ده اتشجع جداً ..

المهم .. عملت له العملية تاني يوم  .. وسافر بعد العملية على طول

عبد الكريم جالي النهاردة بعد شهرين من العملية .. الحمد لله .. عمليته حلوة قوي .. يارب تفضل كده على طول والحول ما يرجعش تاني أبداً

حمد الله على السلامة يا ابني .. والف مبروك

د جمــال صبحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders