اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي المرتجع 4


    

حالة هذا الأسبوع ( 142 ) كرم صالح .. من السودان

" محدش يعمل عملية حول

أي حد بيعمل العمليه

الحول بيرجعله تاني "

 ده من اشهر التعليقات اللي بتتكتب على حالات هذا الاسبوع اللي بانزلها .. وأكيد طبعاً كلكم بتقروها

مبدئياً انا متعاطف جداً مع العيانين اللي بيكتبوا على صفحتي التعليق ده .. وبيصروا يكتبوا نفس التعليق على الحالات اللي بانزلها اسبوعياً .. كل اسبوع ياعيني نفس العيانين يخشوا على صفحتي يكتبوا نفس التعليق .. انا باقدر جداً ظروف اي انسان محبط عمل العمليه عشان يعدل الحول وبعدين للاسف بعد العمليه الحول رجع له تاني .. طبعاً لازم يكون محبط .. وعنده حق ييأس .. ولازم ميصدقش أي كلمه باكتبها على عمليات الحول .. بعض العيانين المحبطين دول بيكون عمل العمليه عند دكاتره غيري .. وبعضهم انا شخصياً اللي عملت له العمليه ..

هو الكلام ده حقيقته ايه .. هو صحيح عمليات الحول دي عمليات فاشله وأي حد بيعمل العمليه بيرجع له الحول تاني ؟ .. ولا ايه الموضوع بالظبط ؟؟

طيب .. كتب الطب والاحصاءات في مراكز ومستشفيات الحول في العالم كله بتقول الآتي :

1. انواع الحول كتيره جداً .. ييجي 80 نوع

2. الغالبيه العظمى من انواع الحول مش بيرجع لها الحول ابداً بعد العمليه .. يعني اللي عنده حول من الانواع دي وعمل عمليه حلوه والحول اتعدل .. يستحيل الحول يرجع له تاني ويعيش زي مايعيش ويكمل حياته وهو زي الفل 

2. انواع الحول التانيه اللي ممكن الحول يرجع لها تاني بعد العمليه مش كتيره .. ولازم الدكتور يقول للعيان النسبه المئويه لرجوع الحول حسب نوع الحول اللي عند العيان .. فيه حول بيرجع بنسبة 1% بس .. وفيه حول بيرجع بنسبة 10% .. ودي اكبر نسبه معروفه للحول المرتجع

3. نسبة الرجوع 10% يعني ايه ؟ .. يعني كل 100 عيان عندهم الحول ده ونعمل لهم العمليه والحول يتعدل .. 90 عيان ميرجعش الحول عندهم ابداً .. و10 عيانين بس هما اللي بيرجع لهم الحول .. وده بنسميه الحول المرتجع .. وال 10% دول هما اللي كل اسبوع يخشوا صفحتي ويخوفوا الناس من العمليه ويقولوا للناس اوعوا تصدقوا الكلام ده .. اوعوا تعملوا العمليه .. احنا عملنا العمليه والحول رجع تاني

4. ملحوظه - لما عيان يعمل عمليه والحول ميتعدلش بالعمليه .. ده مش اسمه حول مرتجع .. ده اسمه عمليه مش ناجحه ولازم تتعمل تاني .. حول مرتجع يعني العمليه نجحت والحول اتعدل وبعدين بعد فتره الحول رجع تاني

5. طيب الحول المرتجع بيرجع بعد العمليه بأد ايه ؟ .. في الحقيقه مفيش قاعده ثابته .. ساعات الحول يرجع بعد العمليه بكام شهر وساعات يرجع بعد العمليه بكام سنه

6. طيب اللي طلع حظه وحش وكان من ال 10% دول والحول رجع له .. يعمل ايه .. يعمل حاجه من اتنين .. يا اما يقعد في البيت زعلان ومحبط ويائس ومكسوف ويدخل كل اسبوع على صفحتي يحذر الناس من العمليه .. يا اما يكون ذكي وشجاع وميرضاش يكمل حياته كده ويصر يعمل عمليه تاني عشان يعدل الحول

7. طيب اللي عنده حول مرتجع وعمل عمليه تاني هل ممكن الحول يرجع له تاني بعد فتره ؟ .. برضه بنسبة 10% .. يعني كل 10 عيانين عندهم حول مرتجع 9 منهم الحول يتعدل وميرجعش تاني ابدا وعيان واحد يرجع له الحول .. والعيان ده يا اما يخش صفحتي تاني يسب ويلعن في عمليات الحول .. يا اما يعمل عمليه تالته .. وهكذا

انا افتكرت الكلام ده بمناسبة كرم حالة هذا الاسبوع رقم 83 .. كرم كان جه مصر من السودان وعمل العمليه سنة 2008 عند استاذ عظيم من اساتذة الحول في مصر كان ساعتها عنده 19 سنه .. كرم كان من ال 10% اللي حكيت لكم حكايتهم .. ورجع له الحول تاني بعد اربع سنين .. .. كرم مكانش من النوع الأول اللي كل اسبوع يخش صفحتي ويعلق تعليقات سلبيه وينقل اليأس والاحباط لباقي المرضى .. لأ كرم جالي العياده وبمنتهى الشجاعه طلب يعمل عندي عمليه تاني .. عملت العمليه لكرم سنة 2012 ودي صورته بعد العمليه .. كرم رجع السودان بعد العمليه على طول .. النهارده فات على عمليته 6 سنين .. مشفتوش من ساعتها .. يا ترى يا كرم انت عامل ايه دلوقتي .. يارب تكون بخير والحول مايكونش رجع تاني .. نفسي تعلق على البوست ده وتطمنا عليك .. يا ريت لو قريت الكلام ده يا كرم تكتب تعليق وتنقل تجربتك دي لكل المعلقين المحبطين اليائسين على صفحتي      

د. جمــال صبـــحي

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders