اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الانسي المرتجع 5


    

 

حالة هذا الأسبوع ( 197 ) عصام عبد الحميد .. 29 سنة .. من اسكندرية

" عصام عمل 3 عمليات حول قبل كده وفشلوا - ودي رابع عملية "

الأول أحب اشكر عصام على روحه الجميلة وثقته الكبيرة في نفسه وانه نزل صوره على صفحتي

مينفعش شاب في سن عصام لسه الدنيا كلها قدامه يرضى انه يعيش حياته بالمنظر ده .. مفيش أي مبرر لكده .. حتى لو كان عمل 3 عمليات قبل كده وفشلت .. برضه ده مش مبرر انه يرضى يعيش كده .. لازم يكون مناضل .. بطل .. لازم يعمل عمليه رابعه وخامسه لو لزم الأمر .. لازم الحول يتعدل لازم .. ازاي محاسب شاطر وناجح في شغله زي عصام يعيش بالحول ده .. طيب يشتغل ازاي.. يتصور وسط أصحابه ازاي .. يحط صورته في البروفايل بتاعه ازاي .. يخطب ازاي .. يبص في عينين ولاده ازاي

عصام جاني من اسكندرية من كام شهر كده

( أول عملية عملتها كنت صغير مش فاكرها كان عندي 4 سنين .. تاني عملية عملتها كان عندي 8 سنين .. تالت عملية عملتها بعد التخرج كان عندي 24 سنة .. كل مرة يا دكتور جمال أخرج من العملية زي ما أنا .. نفس الحول .. مفيش أي تغيير )

عصام لم يستسلم زي كتير من المرضى ..  مش راضي أبداً عن شكله .. عيانين كتير رفعوا الرايه البيضا بعد اول تجربه فاشله .. وكملوا حياتهم محبطين ومكسوفين ويائسين ومتعقدين .. لكن عصام لأ ..  مش هيستسلم .. والدليل انه عمل 3 عمليات قبل كده وأهو جاي النهارده عايز يعمل عمليه تاني .. قصدي رابع

طبعاً مش كتير بنقابل النوع ده من العيانين .. شجاع .. مناضل .. بطل بجد

أنا متعمد أحكي حكاية عصام عشان العيانين اللي عملوا عملية حول والعملية فشلت .. بس خلاص .. الدنيا اسودت .. كارثة قومية .. مصيبة عظمى .. نهاية العالم .. العيانين دول دخلوا اوضتهم .. قفلوا على نفسهم .. بطلوا يتعاملوا مع الناس .. بطلوا يبصوا في عينين حد .. قاعدين باصين في الأرض على طول .. مش عايزين أصلاً يسمعوا سيرة دكاترة ولا مستشفيات ولا سيرة عمليات تاني .. كل شوية يبصوا لنفسهم في المرايا ويتصوروا بالموبايل ويبصوا لصورتهم ويقعدوا يعيطوا .. لما باشوف البنات والولاد دول واسألهم .. طيب يا ابني - ولا يا بنتي سايب ولا سايبه - عينك حوله كده ليه ؟؟ .. تسمع منهم الإجابات العجب :

- أصل أنا عملتها قبل كده وفشلت والدكاترة قالوا مينفعش تتعمل تاني ( طبعاً محصلش لأن عملية الحول بتتعمل عادي مرة واتنين وتلاتة )

    - أصل أنا عملتها قبل كده وفشلت .. أضمن منين انها مش هتفشل تاني .. لأ مش هأعمل عملية تاني .. أنا هأكمل حياتي أحول - ولا حوله - كده

- أصل أنا عملتها قبل كده وفشلت .. وفقدت الأمل خلاص .. خايفة أتمسك بالأمل وأعملها تاني وتفشل .. لو حصل كده مش هاستحمل

للأسف الشديد .. كتير من العيانين بيفكروا كده مش زي بطلنا الشجاع بتاع حالة هذا الأسبوع .. عصام قال لأ .. مش هأعيش كده .. لازم الحول ده يتعدل .. مش هأسكت هأعمل رابع عملية .. ولو فشلت برضه مش هأسكت .. هأعمل خامس وسادس وسابع عملية .. مش هأسكت الا لما الحول يتعدل ويبقى شكلي طبيعي زي باقي الناس

المهم .. عملت لعصام العمليه

النهارده على الواتس فوجئت بعصام باعت صورته الجميلة دي ومعاها كلمات رقيقة مليانة أحاسيس بالبهجة والشكر والفرح بنتيجة العملية .. فعلاً شكله اتغير خالص .. الحمد لله .. مفيش حول خلاص .. مبروك يا ابني عمليتك هايلة جدا .. الحمد لله .. أخيراً يا عصام .. أخيراً مفيش حول .. الضحكة الرائعة اللي في وشه دي هي أكتر حاجه باحبها في شغلي .. الضحكة اللي كلها حمد وشكر دي هي أهم شيئ في حياتي .. ازاي بنقدر بفضل الله تعالى نحول انسان من التكشيرة اليائسة المحبطة إلى الابتسامة الرائعة اللي كلها أمل دي .. فعلا حد تاني خالص .. شاب واثق .. أنيق .. جميل .. مقدرش غير إني اقول الحمد لله رب العالمين .. وألف حمد الله على سلامتك يا بطل .. والله برافو عليك يا عصام

د. جمال صبحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders