اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 10



    
 

حالة هذا الاسبوع ( 81 ) ملك محمد كمال .. 9 سنوات .. من طنطا

" الحول الوحشي للعين الكسلانة "

من اسبوعين كده جت لي العيادة بنت زي القمر اسمها " ملك " .. ملك بنت لطيفة قوي من طنطا ..  صاحبتها على طول .. شكلها كده بتاعة تالتة أو رابعة ابتدائي .. بس ذكية ولبقة ومتكلمة كأنها حد كبير .. ملك عندها حول في عينها الشمال ..

قعدت اتكلم مع مامتها

·       اهلا وسهلا يامدام .. حمد الله على السلامة .. أخبار طنطا إيه ....

·       ملك يا دكتور جمال عندها حول وحشي في العين الشمال .. الحول بدأ وهي عندها حوالي سنتين  .. احنا قلنا نستنى لما تكبر شوية وبعدين نشوف حل في موضوع الحول ده

·       الحول بيبدل يا ماما ؟ .. يعني ساعات الشمال تحول وساعات اليمين ؟ ولا دايما الشمال هي اللي حولة ؟

·       لا يا دكتور .. اليمين مش بتحول ابداَ .. الشمال هي اللي حولة على طول .. انا بشوف صور البنات اللي انت عملت لهم العملية على صفحتك على الفيسبوك .. نفسي يا دكتور جمال اشوف بنتي زي البنات دول

طيب انا نفسي أكلمكم النهاردة بمناسبة عملية ملك الجميلة دي .. أكلمكم عن حاجة مهمة قوي وهي الكسل الوظيفي

أيهما أهم ؟ ... الشكل ولا النظر

طبعاً الشكل حاجة مهمة جداً .. لكن النظر برضه حاجة مهمة جداً جداً ولازم برضه نهتم بتحسين الابصار في العين زي ما بنهتم بإصلاح الشكل     

العين لما تقعد حولة 7 سنين من غير مانعدلها .. بتحصل مشكلة .. الدكاترة بيعتبروا المشكلة دي أهم من الحول نفسه .. المشكلة دي اسمها الكسل الوظيفي .. زي اللي حصل مع ملك كده .. بقالها 7 سنين بتبص بالعين اليمين بس .. والعين الحولة صورتها مش بتوصل للمخ .. طبعاً نظرها بيضعف

طيب والحل إيه يادكتور جمال ؟

·       والله يافندم احنا معندناش أي مشكلة مع الحول .. أي حول ممكن يتعدل بالعملية ان شاء الله .. ده مش مشكلة خالص .. المهم عندنا دلوقتي هي العين الضعيفة الكسلانة دي .. لازم ننشطها ونحسن النظر فيها .. وده هنعمله بعد العملية ان شاء الله بتمارين التغطية مع النضارة ..

المهم عملت العملية لملك من اسبوعين .. جت لي بعد العملية اطمن عليها وجابت لي كارت كاتبة لي فيه كلام زي السكر وراسمة قلب وكده ..

النهاردة ملك بعتت لي من طنطا صورتها على الواتس .. ايه يا بنتي القمر ده .. ايه الضحكة الجميلة دي .. بسم الله ما شاء الله .. الحمد لله رب العالمين .. عمليتك زي الفل .. حمد الله على سلامتك يا بنتي

وشكراً يا مامة ملك ان حضرتك سمحتي لي اني انزل صورتها على صفحتي  في حالة هذا الاسبوع ..

د. جمــال صبحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders